HRW: «Biełaruskija ŭłady zrabili amal niemahčymaj dziejnaść palityčnaj apazycyi»
Takaja vysnova ŭtrymlivajecca ŭ štohadovaj spravazdačy mižnarodnaj pravaabarončaj arhanizacyi.
Choć udzieł u apazycyjnych palityčnych arhanizacyjach u Biełarusi nie supiarečyć zakonu, na praktycy ich dziejnaść amal niemahčymaja. Treba abaviazkova mieć rehistracyju, ale ŭ takoj rehistracyi ŭłady časta admaŭlajuć biespadstaŭna i pa nadumanych pryčynach, havorycca ŭ spravazdačy «Human Rights Watch».
Za minuły hod dziasiatki apazycyjnych aktyvistaŭ byli źbityja i aryštavanyja pa sfalšavanych abvinavačvańniach. Niekatoryja lidery i aktyvisty apazycyi zastajucca za kratami — u pryvatnaści, u spravazdačy zhadvajucca spravy byłoha kandydata ŭ prezydenty Alaksandra Kazulina, asudžanaha na 5 z pałovaj hadoŭ źniavoleńnia pavodle abvinavačvańnia ŭ chulihanstvie, i adnaho ź lideraŭ «Maładoha Frontu» Artura Fińkieviča.
Pravaabaroncy taksama adznačajuć, što za apošni čas šerah biełaruskich studentaŭ byli vyklučanyja z universytetaŭ za ŭdzieł u apazycyjnych arhanizacyjach.
U spravazdačy vykazvajecca zakłapočanaść tym, što biełaruskija ŭłady sprabujuć zapałochać i kantralavać pravaabarončyja arhanizacyi. U pryvatnaści, zhadvajecca admova ŭ rehistracyi pravaabarončamu centru «Viasna» i štrafnyja sankcyi suprać Biełaruskaha Chelsynskaha kamitetu.
U raździele, pryśviečanym svabodzie relihii, havorycca, što ad leta 2006 da leta 2007 hodu ź Biełarusi vysłali bolš za 25 katalickich i pratestanckich śviataroŭ, jakija nibyta stvarali «pahrozu nacyjanalnaj biaśpiecy».
Ahladajučy sytuacyju z medyjami, pravaabaroncy pišuć, što biełaruskija ŭłady ŭzmacniajuć kantrol za internetam, peryjadyčna blakujučy palityčna niepažadanyja sajty. Na dumku aŭtaraŭ spravazdačy «Human Rights Watch», sprava Andreja Klimava, asudžanaha ŭ vieraśni 2007 hodu za publikacyju ŭ internecie, pakazvaje, što internet bolš nie źjaŭlajecca biaśpiečnym miescam dla krytyki ŭładaŭ.