Uładzimir Niaklajeŭ zajaviŭ pra vychad z apazicyjnych struktur
Lidar hramadzianskaj kampanii «Havary praŭdu», kandydat u prezidenty Biełarusi na vybarach 2010 hoda Uładzimir Niaklajeŭ zajaviŭ ab vychadzie z apazicyjnych struktur.
«Dvuchhadovyja pieramovy biełaruskaj apazicyi pa vyłučeńni adzinaha kandydata i vyznačeńni sumiesnaj prahramy na prezidenckija vybary 2015 zaviaršylisia biezvynikova», — havorycca ŭ zajavie Niaklajeva.
«U suviazi z hetym zajaŭlaju ab svaim vychadzie z apazicyjnych struktur, u tym liku z hramadzianskaj kampanii «Havary praŭdu», aktyvistam jakoj ja nazaŭždy ŭdziačny za pracu i padtrymku. Niezaležnaść i demakratyčnaja budučynia Biełarusi zastajucca dla mianie najvažniejšaj kaštoŭnaściu. Dziela hetaha ja budu pracavać i dalej», — padkreślivaje palityk.
Ab vychadzie z apazicyjnaj kaalicyi (u jaje ŭvachodziać «Havary praŭdu», Partyja BNF, ruch «Za svabodu», Biełaruskaja sacyjał-demakratyčnaja partyja (Hramada), Abjadnanaja hramadzianskaja partyja, Biełaruskaja partyja levych «Spraviadlivy śviet») Uładzimir Niaklajeŭ zajaviŭ 8 krasavika na pasiadžeńni «siamiorki», dzie biezvynikova abmiarkoŭvałasia pytańnie ab sklikańni kanhresa demakratyčnych sił i vyłučeńni na im adzinaha kandydata ŭ prezidenty.
Apazicyjnym siłam da hetaha času nie ŭdałosia damovicca ab vyłučeńni adzinaha kandydata, a na siońniašnim pasiadžeńni «siamiorki» nie było dasiahnuta i pahadnieńnie ab praviadzieńni kanhresa demsiłaŭ.
7 krasavika respublikanskaja rada «Havary praŭdu» pryniała rašeńnie vyłučać kandydatam u prezidenty aktyvistku kampanii Taćcianu Karatkievič.