Siamiejny kanflikt u Alpach: film «Fors-mažor»
Žanr: drama, kamiedyja
Režysior: Rubien Estłund
U rolach: Jochanes Kunkie, Liza Łovien Konhśli, Vinsent Vieterhien, Kłara Vieterhien, Krystafier Chivju, Fani Mietelius, Karyn Mirenbierh, Brejdzi Korbiet
Šviecyja, Francyja, Danija, Narviehija, 120 chv.
Adznaka: 7
Siamja sa Šviecyi adpačyvaje na alpijskim hornym kurorcie: biznesmien Tomas, jaho žonka Ebi i dvoje dziaciej. Na druhi dzień kantralavanaja śniežnaja łavina vychodzić z-pad kantrolu — i śniežny pył zasypaje siamju padčas śniadanku.
Tomas u panicy ŭciakaje, pakinuŭšy žonku i dziaciej. Nichto ź ich nie paciarpieŭ, i praz paru chvilin jon viartajecca. Bajaźlivaść muža i niežadańnie pryznać svaju pamyłku naradžaje kanflikt u siamji.
Režysior i aŭtar scenara Rubien Estłund padčas stvareńnia čarhovaj dramy natchniaŭsia rolikami z YouTube. U pryvatnaści, tak u scenary źjaviłasia śniežnaja łavina, jakaja dała šturšok hetaj historyi. Tam ža režysior znajšoŭ muzyčnaje afarmleńnie — vykananuju na akardeonie temu z «Leta» Vivaldzi.
Stužka adznačajecca niaśpiešnym rytmam i statyčnymi płanami hornaha kurorta i mizanscen.
Sceny isteryk spačatku žonki, a paśla muža śpiecyjalna zaciahnutyja, režysior prapanuje ź ironijaj pastavicca da stychijnaha kanfliktu. Jaho centralnaja tema — nieabchodnaść prajavy mužnaści ŭ niekatorych situacyjach va ŭmovach hiendarnaj roŭnaści.
Zdymki adbyvalisia ŭ francuzskich Alpach, a zaklučnyja sceny źniatyja na malaŭničaj hornaj šašy ŭ paŭnočnaj Italii — Stelvia.
Stužka była vysoka acenienaja suśvietnymi kinakrytykami. Jana atrymała nacyjanalnuju ŭznaharodu Šviecyi «Załaty žuk — 2014» jak najlepšy film, a taksama była pakazanaja na Kanskim kinafiestyvali ŭ prahramie «Asablivy pohlad», dzie atrymała premiju žury. Hety ž film pradstaŭlaŭ Šviecyju na «Oskary» (film na zamiežnaj movie). Film rekamiendujecca amataram art-chaŭzu i jeŭrapiejskaha kino.