U Minsku 22 terytoryi źjaŭlajucca volnymi ad tytuniovaha dymu
U Minsku volnymi ad tytuniovaha dymu źjaŭlajucca 22 terytoryi. Pra heta paviedamiła siońnia žurnalistam zahadčycca redakcyjna-vydavieckaha adździeła haradskoha centra zdaroŭja Alaksandra Łahun.
«Z kožnym hodam pavialičvajecca kolkaść terytoryj, svabodnych ad tytuniovaha dymu. Heta vielmi važna i značna. Kali raniej my pisali spačatku ab 14, potym ab 15, 16 takich terytoryjach, to na siońniašni dzień rašeńniami rajonnych administracyj u nas u horadzie 22 terytoryi, svabodnyja ad tytuniu. Akramia taho mnohija kiraŭniki pradpryjemstvaŭ, cudoŭna razumiejučy, nakolki niehatyŭna ŭpłyvaje kureńnie tytuniu na zdaroŭje ich słužačych, taksama ŭvodziać zabaronu abo abmiežavańnie na kureńnie ŭ rabočy čas na terytoryjach svaich pradpryjemstvaŭ», — skazała Alaksandra Łahun.
Naprykład, u Zavodskim rajonie zonaj, svabodnaj ad kureńnia, źjaŭlajecca Minski zaapark, terytoryja płoščy pierad univiermaham «Biełaruś», a taksama Park kultury i adpačynku imia 900-hodździa Minska. U Leninskim rajonie svabodnymi ad kureńnia abjaŭleny terytoryi Łošyckaha siadzibna-parkavaha kompleksu i Alaksandraŭski skvier. Rašeńniem administracyi Maskoŭskaha rajona ŭviedziena zabarona na kureńnie na płoščy Niezaležnaści z prylehłymi da jaje terytoryjami. U Partyzanskim rajonie takoj zonaj abjaŭleny Centralny dziciačy par imia Horkaha, a ŭ Frunzienskim rajonie — park imia 60-hodździa Kastryčnika, park «Miadźviedžyna». Zonami, svabodnymi ad kureńnia, u Kastryčnickim rajonie abjaŭleny haścinica «Spadarožnik», terytoryja parka Kurasoŭščyna, harnałyžny centr «Soniečnaja dalina» i inš.
Akramia taho, znaki ab zabaronie kureńnia raźmieščany na 1 836 prypynačnych punktach kamunalnaha transpartu. Taksama pryniaty miery ŭ adnosinach da kafe i restaranaŭ. U śfiery hramadskaha charčavańnia funkcyjanuje 2 200 abjektaŭ, siarod jakich u 250 kureńnie poŭnaściu zabaroniena, u 180 jość asobnyja zały dla kurcoŭ i niekurcoŭ, a ŭ astatnich praduhledžany śpiecyjalna adviedzienyja miescy dla kureńnia (choły).