Aŭtar New York Times rekamiendavaŭ zachoŭvać klučy ad novych mašyn u maraziłcy
Albo ŭ kletcy Faradeja, kab nie mierźli.
Vyjava: Gary Hallgren, New York Times
Nik Biltan na staronkach The New York Times raspavioŭ pra novy sposab kradziažu mašyn. U niebiaśpiecy chiba nie ŭsie, chto maje elektronnyja zamki.
Złačyncy navučylisia ŭskryvać elektronnyja zamki novych aŭto z dapamohaj nievialičkaj elektronnaj pryłady, vykarystańnie jakoj moža zasvoić i padletak.
U rajonie Łos-Anželesa, dzie žyvie Biltan, adbyłosia niekalki zahadkavych uhonaŭ: złačyncy nie pakinuli nijakich śladoŭ fizičnych uzajemadziejańniaŭ z aŭto. Usie mašyny byli z elektronnymi zamkami.
Sam Biltan byŭ śviedkam troch sprob uhonu jaho Toyota Prius 2013 hoda. Apošniuju sprobu jon apisvaje tak: chłopiec i dziaŭčyna padjechali da mašyny na rovarach, dziaŭčyna dastała z zaplečnika niejkuju čornuju karobačku, supakojna adčyniła dźviery i sieła ŭ mašynu. Aŭtaru paščaściła svaječasova heta zaŭvažyć i vyskačyć da mašyny, ale złačyncy ŭciakli na svaich rovarach.
Ni palicyja, ni kampanija Toyota nie zmahli patłumačyć Biltanu, jak pracuje tajamničaja čornaja skrynačka.
Ale pra padobnyja vypadki, jak pakazała jaho rasśledavańnie, papiaredžvała kanadskaja palicyja i šerah aŭtamabilnych vydańniaŭ.
Adzin sa sposabaŭ uzłomu praduhledžvaŭ padbor koda-kluča da elektronnaha zamka praz noŭtbuk i radyjopieradatčych (tak skrali BMW X5 u Devida Bekchema). U inšym sposabie apisvałasia pryłada, što samastojna emuluje kluč biaśpieki, ale tolki dla BMW (takija źbirajuć u Kitai i Uschodniaj Jeŭropie dy pradajuć za 30 dalaraŭ).
Mienavita pad vypadak Biltana nie padyšoŭ nivodny. Vyrašeńnie jamu padkazaŭ śpiecyjalist pa biespravadnych pryładach Barys Danieŭ, zasnavalnik kampanii 3db Technologies. Jon apisaŭ pryładu, što ŭzmacniaje sihnał ad elektronnaha kluča.
Nie elektronny kluč admykaje mašynu — samo aŭto šukaje kluč pablizu, kali ŭładalnik sprabuje adčynić dźviery. Hadžet za 15-17 dalaraŭ prosta robić kluč «bližejšym» da mašyny.
Takija pryłady, pa słovach Danieva, volna pradajucca ŭ internecie. Śpiecyjalist viadzie pieramovy z vytvorcami aŭto ab vykarystańni čypaŭ ułasnaj raspracoŭki, ustojlivych da takoha ŭzłomu.
Ale pakul adzin nadziejny sposab abaranić aŭto z elektronnym klučom — schavać jaho ŭ kletku Faradeja. U bytavych umovach u jaje jakaści moža vystupić prostaja maraziłka. Tam Biltan i zachoŭvaje svaje klučy ad mašyny — pobač z šakaładnym marozivam.