Mierkiel — Parašenku: My jašče nie tam, dzie chočam być
«My jašče nie tam, dzie chočam być» — tak acharaktaryzavała vykanańnie lutaŭskich minskich pahadnieńniaŭ ab urehulavańni kanfliktu na Danbasie kancler Hiermanii Anhieła Mierkiel na sustrečy z prezidentam Ukrainy Piatrom Parašenkam u Bierlinie 13 maja.
Pavodle jaje słoŭ, jakija pryvodzić pres-słužba ŭrada FRH, na ŭschodzie Ukrainy pa-raniejšamu niama poŭnaha spynieńnia ahniu, asabliva ŭ rajonie nasielenaha punkta Šyrokina pablizu Maryupala i kala Danieckaha aeraporta, adkul amal štodnia pastupaje infarmacyja pra zabitych i paranienych.
«Dla mianie vidavočna, što minskija pahadnieńni źjaŭlajucca płatformaj, na jakoj my pavinny dziejničać. I Hiermanija pasprabuje tut zrabić usio mahčymaje razam z Francyjaj», — skazała Mierkiel. Jana adznačyła, što znoŭ havaryła pra minskija damoŭlenaści na sustrečy z prezidentam Rasii Uładzimiram Pucinym 10 maja ŭ Maskvie. Baki pahadzilisia ź nieabchodnaściu praciahvać pracu ŭ narmandskim farmacie (Ukraina — Hiermanija — Francyja — Rasija). «Heta ciažka, heta ŭtomna, adnak Ukraina zasłužyła poŭnuju padtrymku na ekanamična paśpiachovym šlachu i na šlachu da miru», — zajaviła kancler.
«My ŭpeŭnienyja ŭ tym, što alternatyvy Minsku nie isnuje, i ja jak prezident Ukrainy, biezumoŭna, nastojvaju na mirnym urehulavańni», — skazaŭ Piatro Parašenka, jakoha cytuje jaho pres-słužba. Parašenka adznačyŭ, što Ukraina źjaŭlajecca absalutna žorstkim prychilnikam niaŭchilnaha vykanańnia ŭsich biez vyklučeńnia punktaŭ minskich pahadnieńniaŭ. «My demanstrujem realny prahres u zabieśpiačeńni režymu spynieńnia ahniu, u advodzie vojskaŭ i pačatku pracy rabočych padhrup na minułym tydni ŭ Minsku», — padkreśliŭ prezident.