Brytaniec zrabiŭ sełfi z žančynaj, dziela jakoj schudnieŭ na 305 kiło FOTA
Na što vy hatovyja dziela kachanaj?
Poł Mejsan i Rebeka Maŭntn. Fota z asabistaj staronki Mejsana na Facebook
Były paštaljon ź Ipśviča, Vialikabrytanija, Poł Mejsan, jaki niekali byŭ samym ciažkim čałaviekam płaniety, zrabiŭ sełfi sa svajoj kachanaj — Rebekaj Maŭntn z Masačusetsa, ZŠA. Historyju kachańnia i straty troch centnieraŭ raspaviadaje The Daily Mail.
41-hadovaja Rebeka (jakaja, darečy, važyć kala 50 kh) čarhovy raz sustrełasia nažyvuju z 54-hadovym Mejsanam ŭ Štatach paśla jaho apošniaj apieracyi. Para prahulałasia (što dla Mejsana samo pa sabie niezvyčajna) pa Centralnym parku Ńju-Jorka, dzie i zrabiła zhadanaje sełfi.
Da znajomstva z Rebekaj Mejsan važyŭ 445 kiło — suśvietny rekord. Paźniej jon prajšoŭ šuntavańnie straŭnika, što dazvoliła jamu za schudnieć na try čverci svajoj vahi. Siońnia jon važyć 127 kiło.
Mejsan da schudnieńnia. Fota z sajta dailymail.co.uk
Mejsan da i paśla vydaleńnia lišniaj skury. Fota z asabistaj staronki na Facebook
U krasaviku Mejsan prajšoŭ doŭhačakanuju apieracyju pa vydaleńni lišniaj skury, praz što straciŭ dadatkovyja 21 kh. Doŭhi čas roznyja daktary nie dazvalali apieracyju — chacieli pierakanacca, što Mejsan nie stanie znoŭ nabirać vahu. Apieracyju pahadzilisia pravieści ŭ Ńju-Jorku. Dla zdarovaha žyćcia jamu spatrebicca jašče adna takaja apieracyja.
Mejsan prajšoŭ šuntavańnie straŭnika jašče ŭ 2010 hodzie. Ale, pavodle jaho słoŭ, schudnieć jamu dapamahło znajomstva z Rebekaj u 2013 hodzie. Para paznajomiłasia praz Facebook — Rebeka napisała Połu paśla taho, jak pahladzieła dakumientalny film pra jaho. Žančyna chacieła dapamahčy znajści jamu pamočnika pa haspadarcy, ale pieršaja ž razmova pa Skype zaciahnułasia na čatyry z pałovaj hadziny.
U chutkim časie para płanuje ažanicca.
«Kali ja zhadvaju, jak lažaŭ u łožku siem dzion na tydzień i dumaŭ tolki pra ježu, ja nie vieru, što heta byŭ ja», — kaža Mejsan. Da znajomstva z Rebekaj jon spažyvaŭ 20 tysiač kałoryj na dzień (pry normie ŭ dźvie z pałovaj tysiačy) — mienavita kachańnie padšturchnuła jaho da schudnieńnia.