Sioleta samy vysoki konkurs u Licei BDU byŭ na ruskuju fiłałohiju, a samy vysoki bał — na biełaruskuju
Siaredni konkurs na pastupleńnie ŭ licej Biełdziaržuniviersiteta sioleta skłaŭ siem čałaviek na miesca (letaś — 6,4), paviedamlaje pres-słužba BDU pavodle vynikaŭ ustupnaj kampanii.
Usiaho ŭ licej pastupaŭ 1.651 čałaviek, uklučajučy 31 pieramožcu respublikanskich pradmietnych alimpijad. U 10-ty kłas zaličanyja 264 navučency, ź jakich buduć sfarmiravanyja 12 kłasaŭ pa 22 čałavieki. Vosiemdziesiat pracentaŭ zaličanych — minčanie. Upieršyniu ŭ historyi navučalnaj ustanovy rekamiendavanyja da zaličeńnia navučency, jakija vyvučali ŭ bazavaj škole kitajskuju movu.
Najbolš zapatrabavanymi ŭ abituryjentaŭ byli fizika-matematyčnyja kłasy, na pastupleńnie ŭ jakija było padadziena 649 zajavak, a konkurs skłaŭ 6,3 čałavieka na miesca. U fiłałahičnyja kłasy sprabavali pastupić 358 čałaviek, chimika-bijałahičnyja — 327, hramadaznaŭčyja — 166, chimika-matematyčny — 151.
Samy vysoki konkurs byŭ zafiksavany na ruskim fiłałahičnym kirunku — 11,3 čałavieka na miesca.
Dla pastupleńnia na hramadaznaŭčy kirunak sioleta nieabchodna było nabrać 116 bałaŭ, na ruski fiłałahičny — 123, na biełaruski fiłałahičny — 142, na chimika-bijałahičny — 125, na chimika-matematyčny — 124, fizika-matematyčny — 115.
U licej BDU mohuć pastupać navučency, jakija pastajanna žyvuć na terytoryi Biełarusi i atrymali sioleta ahulnuju bazavuju adukacyju. Pieramožcy respublikanskich alimpijad (dypłomy I, II i III stupieniaŭ), što pravodzilisia Ministerstvam adukacyi ŭ hetym navučalnym hodzie, zaličajucca biez papiarednich ispytaŭ.