U Biełarusi buduć vykaraniać schavanuju rekłamu ałkaholu i cyharet
Deputaty Pałaty pradstaŭnikoŭ siońnia na pasiadžeńni pryniali ŭ druhim čytańni papraŭki ŭ zakon Biełarusi «Ab rekłamie».
Zakonaprajekt byŭ pryniaty ŭ pieršym čytańni ŭ kastryčniku 2014 hoda. Jak rastłumačyŭ namieśnik staršyni Pastajannaj kamisii pa žyllovaj palitycy i budaŭnictvie Leanid Kavalevič, dakumient nakiravany na ŭdaskanaleńnie pravavoha rehulavańnia adnosin, jakija źviazany z papiaredžańniem raźmiaščeńnia, raspaŭsiudžvańnia rekłamy ałkaholnych napitkaŭ i tytuniovych vyrabaŭ pad vyhladam rekłamy inšych tavaraŭ (rabot, pasłuh), arhanizacyj i hramadzian, i nakiravany na pavyšeńnie efiektyŭnaści mier pa papiaredžańni i pieraadoleńni pjanstva, ałkahalizmu i tytuniekureńnia, a taksama źnižeńnie ŭzroŭniu spažyvańnia ałkaholu i tytuniu nasielnictvam, źmianšeńnie niehatyŭnych vynikaŭ ich spažyvańnia dla hramadstva.
«Tak, u metach vyklučeńnia mahčymych złoŭžyvańniaŭ dla rekłamy, padobnaj da rekłamy ałkaholnych i tytuniovych vyrabaŭ, ustanaŭlivajecca taki ž abmiežavalny režym, jak i dla rekłamy abaznačanaj pradukcyi. A mienavita - zabaranić rekłamu, padobnuju da rekłamy ałkaholnych napitkaŭ, u miescach, dzie rekłama takich napitkaŭ zabaroniena. Poŭnaściu zabaranić rekłamu, padobnuju da rekłamy tytuniovych vyrabaŭ», - raskazaŭ parłamientaryj. Jon taksama rastłumačyŭ: pad padobnaj u zakonaprajekcie majecca na ŭvazie rekłama, jakaja źmiaščaje nazvu tavaru, arhanizacyi, proźvišča hramadzianina, jaho ŭłasnaje imia, imia pa baćku (kali takoje jość), tavarny znak abo znak absłuhoŭvańnia, vyjavu tavaru abo jaho spažyvieckaj upakoŭki i h.d.
Pry hetym zakonaprajektam prapanujecca nie raspaŭsiudžvać usie hetyja abmiežavańni na rekłamu arhanizacyj abo hramadzianina, što raźmiaščajecca na znadvornych šyldach i pakazalnikach, pakolki spažyviec pavinien być prainfarmavany, jaki subjekt pa hetym adrasie raźmiaščajecca. «Heta ž adnosicca da intervju ab dziejnaści arhanizacyi. Dapuścim, u časopisie raźmiaščajecca intervju dyrektara Hrodzienskaj tytuniovaj fabryki abo zavoda «Kryštal» abo luboha inšaha vinna-harełačnaha zavoda. Taksama heta datyčycca sacyjalnaj rekłamy, u jakoj u prafiłaktyčnych metach vykarystoŭvajucca vyjavy tary, što nahadvaje ałkaholnuju abo tytuniovuju spažyvieckuju taru», - paviedamiŭ Leanid Kavalevič.
Akramia taho, pavodle jaho słoŭ, papraŭkami praduhledžvajecca pryviadzieńnie terminałohii zakona «Ab rekłamie» ŭ adpaviednaść z patrabavańniami inšych zakanadaŭčych i mižnarodna-pravavych aktaŭ, jakija składajuć narmatyŭnuju pravavuju bazu Mytnaha sajuza i Adzinaj ekanamičnaj prastory.