Kalakin: Ułady mohuć vyzvalić Statkieviča da vybaraŭ
Staršynia Biełaruskaj partyi levych «Spraviadlivy śviet» Siarhiej Kalakin miarkuje, što ŭłady vypuściać na volu kandydata ŭ prezidenty na vybarach 2010 hoda Mikałaja Statkieviča. Pra heta jon paviedamiŭ u interv`iu BiełaPAN.
«U chutkim časie Statkievič moža apynucca na voli, — skazaŭ jon. — Ale heta zusim nie ŭ suviazi z tym, što pad jaho vyłučeńnie kandydatam u prezidenty zaraz farmirujecca inicyjatyŭnaja hrupa».
Pavodle słoŭ Kalakina, uładam «vielmi treba, kab adbyłasia lehitymacyja vybaraŭ, a najaŭnaść palitviaźniaŭ ź`iaŭlajecca vielmi vialikaj pieraškodaj na šlachu da hetaha». «Pra heta havorać našym uładam usie jeŭrapiejskija i amierykanskija palityki, jakija pryjazdžajuć u Biełaruś. Ułady dobra viedajuć, što heta pytańnie ź`iaŭlajecca dla Zachadu vielmi adčuvalnym. Dumaju, jany pojduć na jaho vyrašeńnie», — skazaŭ jon.
Kalakin zaznačyŭ, što dla vyzvaleńnia Statkieviča treba, kab «heta skazaŭ usłych, navat nie publična, adzin čałaviek u krainie». «Jość dziasiatki sposabaŭ upakavać heta rašeńnie jurydyčna, ale dla hetaha pavinna być skazana słova adnaho čałavieka. Pryčym jano moža być skazana ranicaj, a praź dźvie hadziny Statkievič apyniecca za varotami turmy», — padkreśliŭ jon.
Kalakin ličyć biessensoŭnym farmiravańnie inicyjatyŭnaj hrupy pa vyłučeńni Statkieviča na prezidenckich vybarach hetaha hoda. «Partyja nie ličyć, što heta simvaličnaje dziejańnie dapamoža Statkieviču. Heta absalutna biessensoŭny zaniatak, tamu što nijakich palityčnych vychadaŭ jon nie maje. Ja razumieju, kali b udavałasia zarehistravać inicyjatyŭnuju hrupu i źbirać podpisy ŭ jaho padtrymku, heta mieła b sens. Ale hetaha nie budzie. Heta virtualnaje mierapryjemstva, jakoje nie maje palityčnaha vyjścia», — zaznačyŭ jon.
Bolš za toje, na pohlad Kalakina, «jano moža navat pahoršyć stanovišča Statkieviča, jaki znachodzicca ŭ źniavoleńni, ale nie paŭpłyvaje na jaho vychad».