Členy sadoŭnickich tavarystvaŭ buduć rabić roŭnyja ŭznosy niezaležna ad pamieru ŭčastka
U Biełarusi členy sadoŭnickich tavarystvaŭ buduć rabić roŭnyja ŭznosy niezaležna ad pamieru ŭčastka. Heta praduhledžana ŭkazam №323, jaki Alaksandr Łukašenka padpisaŭ 13 lipienia.
Dla ŭdaskanaleńnia pravavoha rehulavańnia dziejnaści sadoŭnickich tavarystvaŭ unosiacca dapaŭnieńni i źmianieńni va ŭkaz numar 50 ad 28 studzienia 2008 hoda. Pašyrajecca pieralik pytańniaŭ vyklučnaj kampietencyi ahulnaha schodu tavarystva i nie padlahajučych pieradačy dla razhladu schodu ŭpaŭnavažanych. Heta vyklučeńnie z členaŭ tavarystva, pryniaćcie rašeńniaŭ ab jaho rearhanizacyi i likvidacyi, zaćviardžeńnie pieradatačnaha akta abo raździalalnaha bałansu.
Ahulnamu schodu tavarystva pradastaŭlajecca taksama prava prymać asob, jakija nie źjaŭlajucca jaho členami, na rabotu ŭ jakaści staršyni praŭleńnia, kaznačeja. Pry hetym ab vybrańni (vyzvaleńni ad zajmajemaj pasady) staršyni praŭleńnia tavarystva pavinna paviedamić u vykankam u 10-dzionny termin z daty zaklučeńnia (skasavańnia, spynieńnia) pracoŭnaha dahavora.
Ukazam ustanaŭlivajecca abaviazak členaŭ tavarystva ŭnosić členskija ŭznosy ŭ roŭnym pamiery niezaležna da vieličyni ziamielnych učastkaŭ, jakija znachodziacca ŭ ich, pakolki ŭznosy pryznačany dla finansavańnia ahulnych biahučych raschodaŭ tavarystva. Vyznačać kankretnyja pamiery ŭznosaŭ i terminy ich uniasieńnia pa-raniejšamu budzie ahulny schod abo schod upaŭnavažanych.
Statuty tavarystvaŭ, zarehistravanych da ŭstupleńnia ŭ siłu ŭkaza numar 323, padlahajuć pryviadzieńniu ŭ adpaviednaść pry pieršym uniasieńni ŭ ich źmianieńniaŭ, dapaŭnieńniaŭ. Da hetaha momantu jany dziejničajuć u častcy, što nie supiarečyć jamu.
Akramia taho, ukaz pradastaŭlaje vykankamu prava pry vyjaŭleńni niezarehistravanych ziamielnych učastkaŭ nakiroŭvać hramadzianam pradpisańni ab nieabchodnaści źviarnucca pa dziaržaŭnuju rehistracyju ŭ miesiačny termin z dnia jaho atrymańnia. Nievykanańnie patrabavańniaŭ pradpisańnia budzie źjaŭlacca padstavaj dla adabrańnia ziamielnaha ŭčastka.
Ukaz numar 323 ustupaje ŭ siłu praz šeść miesiacaŭ paśla jaho aficyjnaha apublikavańnia.