Prodaž rasijskaj sielhastechniki ŭ Biełarusi ŭpaŭ na tracinu
U pieršaj pałovie 2015 hoda prodaž rasijskaj sielhastechniki ŭ Biełarusi źmienšyŭsia na 33% u paraŭnańni z anałahičnym letašnim pieryjadam, havorycca ŭ paviedamleńni rasijskaj asacyjacyi vytvorcaŭ sielhastechniki «Rasahramaš».
Pavodle źviestak asacyjacyi, Biełaruś — adziny ekspartny rynak, na jakim sioleta skaraciŭsia prodaž rasijskaj sielhastechniki.
«U asacyjacyi «Rasahramaš» heta tłumačać dyskryminacyjnym staŭleńniem respubliki da rasijskaj pradukcyi sielhasmašynabudavańnia, administracyjnym naciskam na biełaruskich sielhasvytvorcaŭ, jakim faktyčna zabaranili nabyvać rasijskuju sielhastechniku», — padkreślivajecca ŭ paviedamleńni «Rasahramaša». Asacyjacyja abjadnoŭvaje 110 arhanizacyj, na dolu jakich prypadaje bolš za 80% pradukcyi sielhasmašynabudavańnia, vyrablenaj u Rasii.
U toj ža čas, pavodle źviestak asacyjacyi, na inšych kirunkach ekspart rasijskaj sielhastechniki ŭ pieršaj pałovie 2015 hoda značna vyras.
Tak, pastaŭki rasijskaj sielhastechniki ŭ Hiermaniju, Francyju, Bałharyju, Turcyju, Kanadu i Azierbajdžan za šeść miesiacaŭ 2015 hoda, u paraŭnańni z anałahičnym pieryjadam 2014 hoda, vyraśli ŭ try razy. U dva razy ekspart rasijskaj sielhastechniki vyras u Kazachstan, Manholiju i Tadžykistan.
«My bačym rost popytu na rasijskuju pradukcyju praktyčna na ŭsich rynkach — Jeŭropy, Azii, Zakaŭkaźzia. I ŭ hetym zasłuha našych ajčynnych vytvorcaŭ, jakija vyrablajuć mašyny, što nie sastupajuć pa svaich techničnych charaktarystykach zamiežnym mašynam, a pa ekanamičnych pakazčykach ich navat pierasiahajuć», — prakamientavaŭ vyniki pieršaha paŭhodździa dyrektar asacyjacyi «Rasahramaš» Jaŭhien Karčavoj.
U vartasnym vyražeńni abjom ekspartu rasijskaj sielhastechniki skłaŭ u pieršym paŭhodździ 3,8 młrd. rasijskich rubloŭ, što ŭ dva razy bolš u paraŭnańni z anałahičnym pieryjadam minułaha hoda.
Miž inšym ekspart biełaruskaj sielhastechniki sioleta značna źniziŭsia. Tak, pavodle źviestak za studzień—maj 2015 hoda, ekspart biełaruskich mašyn dla padrychtoŭki i apracoŭki hleby skłaŭ 4.546 adzinak i źniziŭsia na 28,5% u paraŭnańni z anałahičnym pieryjadam minułaha hoda.