Rekanstrujavać budynki ŭ histaryčnym centry Minska buduć Juryj Čyž i pravasłaŭnaja carkva
Biełaruskaja Pravasłaŭnaja Carkva i kampanija «Trajpł» zojmucca dobraŭparadkavańniem terytoryi ŭ histaryčnym centry Minska z pryčyny pieradavaryjnaha stanu budynkaŭ. Pra heta paviedamili ŭ Administracyi Centralnaha rajona Minska, jakaja arhanizavała praceduru hramadskich abmierkavańniaŭ spravazdačy ab acency ŭździejańnia na navakolnaje asiarodździe pa hetym prajekcie.
Fota: Vadzim Zamiroŭski, tut.by
Kompleks administracyjnych budynkaŭ i budynkaŭ Jeparchijalnaha Upraŭleńnia Biełaruskaj Pravasłaŭnaj Carkvy znachodzicca pa vuł. Vyzvaleńnia, 6, 6a, 8 u Minsku. «Niešta budzie źniesiena, niešta — rekanstrujavana. Tut buduć administracyjnyja pamiaškańni, kramy, punkty hramadskaha charčavańnia. Kanceptualna ničoha nie budzie vybivacca z zabudovy histaryčnaj častki horada. Heta budzie małapaviarchovaja zabudova», — rastłumačyli ŭ Administracyi Centralnaha rajona.
Terytoryja zabudovy budzie akulturanaja, źjavicca i padziemny parkinh.
U cełym prajekt upisvajecca ŭ histaryčnuju zabudovu Rakaŭskaha pradmieścia, stratehiju zabudovy jakoha niadaŭna svaim ŭkaz № 306 uchvaliŭ Alaksandr Łukašenka.
Zakazčykam prajekta vystupaje carkva, a zabudoŭščykam — kampanija «Trajpł». Sprava ŭ tym, što budynki źjaŭlajucca ŭłasnaściu BPC. Tut ža pobač znachodzicca administracyjny centr Biełaruskaha ekzarchata i Minskaj jeparchii.
Budaŭnictva budzie vieścisia za košt srodkaŭ «Trajpła», skazali ŭ BPC, ale admovilisia ahučyć sumu ŭkładańniaŭ, spasłaŭšysia na kamiercyjnuju tajnu. Ad inšych kamientaroŭ tam admovilisia.
Prajekt płanujecca realizavać da kanca 2017 hoda.
«Trajpł» Juryja Čyža ŭžo nie pieršy raz supracoŭničaje z BPC. «Naša Niva» paviedamlała pra toje, što ŭ elitnym katedžnym pasiołku «Łahožask», jaki buduje «Trajpł», pieršym asobam BPC byli vyłučanyja jak minimum dva katedžy. Adzin ź ich mierkavałasia vykarystoŭvać jak pryvatny malitoŭny dom.