U internecie startavała kampanija suprać budaŭnictva ŭ Minsku «hazpromaŭskaj» raźviazki ŭ jaje ciapierašnim vyhladzie
U internecie startavała kampanija suprać budaŭnictva ŭ Minsku «hazpromaŭskaj» raźviazki ŭ jaje ciapierašnim vyhladzie, paviedamiŭ aktyvist Minskaha viełasipiednaha tavarystva Pavieł Harbunoŭ.
U sietcy stvorany sajt razvyazka.net, dzie abhruntoŭvajecca nieabchodnaść admovy ad dvuchuzroŭnievaj raźviazki na skryžavańni praśpiekta Niezaležnaści i vulicy Filimonava kala budučaha ofisa rasijskaj kampanii «Hazprom» (zapłanavany na miescy źniesienaha aŭtavakzała «Maskoŭski»).
Pavodle mierkavańnia aktyvistaŭ, takaja raźviazka «razburyła b biascennuju parkavuju zonu bieź jakoj-niebudź karyści dla piešachodaŭ, viełasipiedystaŭ i miascovych žycharoŭ». «Mnohija minskija śpiecyjalisty pa transpartnym płanavańni i prajekciroŭščyki ŭ kułuarach taksama havorać ab tym, što budaŭnictva hetaj raźviazki z punktu hledžańnia transpartnaha prajektavańnia biessensoŭnaje», — śćviardžajuć inicyjatary akcyi i prapanoŭvajuć na sajcie alternatyŭnyja padychody.
Adzin ź ich — budaŭnictva lohkaha padviesnaha mosta na asnovie inavacyjnaj raźviazki Hovenring u Niderłandach. Prajekt «zabiaśpiečvaje poŭnaje adździaleńnie aŭtamabilnaha ruchu ad piešachodaŭ i viełasipiedystaŭ».
Aktyvisty prosiać Minharvykankam i pradstaŭnictva «Hazproma» prypynić realizacyju ciapierašniaha prajekta, «praanalizavać metazhodnaść budaŭnictva raźviazki ŭ cełym i bolš ekałahičnyja alternatyvy, realizavać jakija mahčyma navat na siońniašniaj stadyi budaŭnictva».
Inicyjatary akcyi zaklikajuć minčan vykazać svaju pazicyju, adpraviŭšy list na adras pradstaŭnictva Hazprama i Minharvykankama. Uzory listoŭ znachodziacca na sajcie kampanii.