Maskvičy chacieli pierajmienavać mienskuju vulicu Kalinoŭskaha
Chram Usich śviatych, budaŭnictva jakoha było pačataje ŭ 2006 hodzie na vulicy Kalinoŭskaha, vierahodniej za ŭsio, «prapišuć» pa inšym jurydyčnym adrasie. Pryčynaj hetamu, pavodle źviestak «Salidarnaści», jość niezadavolenaść maskoŭskich sponsaraŭ budaŭnictva.
U 2005 hodzie premjer‑ministar Siarhiej Sidorski zaćvierdziŭ prajekt «Chram‑pomnik u honar usich śviatych i ŭ pamiać biaźvinna zabitych u Ajčynie našaj pa vulicy Kalinoŭskaha ŭ h. Miensku». Vosieńniu 2006 hodu na tuju samuju vulicu dla ŭdziełu ŭ cyrymonii aśviačeńnia zvanoŭ hetaha chramu pryjaždžaŭ Alaksandar Łukašenka. A ŭ kancy 2007 hodu bieznazoŭnaja vulica, jakija skryžoŭvajecca z vulicaj Kalinoŭskaha i złučaje kalcavuju darohu ź miescam budaŭnictva chramu atrymała nazvu Ŭsichśviackaja.
Pavodle infarmacyi ź nieaficyjnych krynic, heta było zroblena dla taho, kab nie davać chramu jurydyčny adras na vulicy Kalinoŭskaha.
— Pakul ličycca, što chram uzvodzicca na vulicy Kalinoŭskaha. Ale chutka haradzkija ŭłady buduć zaćviardžać jahony jurydyčny adras, i heta, vierahodniej za ŭsio, budzie vulica Ŭsichśviackaja, — skazali «Salidarnaści» pa telefonie chramu «Ŭ honar śviatoj Troicy», raźmieščanaha ŭ niekalkich metrach ad budoŭli.
Pahadžajecca z hetaj prapanovaj i pradstaŭnik hienpadradčyka — hałoŭny inžyner ZAT «Trest «Prambud» Uładzimier Mikałajčyk.
— Vulicu nazvali Ŭsichśviackaj specyjalna «pad chram». Pa sutnaści, aproč jaho i stancyi techabsłuhoŭvańnia na joj ničoha niama, — razvažaje jon.
Čamu ž usio‑taki ŭźnikła prablema z «prapiskaj» na vulicy Kalinoŭskaha? Pavodle źviestak «Salidarnaści», pryčynaj hetamu stała pazycyja maskoŭskich fundataraŭ. Daviedaŭšysia, što chram znachodzicca na vulicy, nazvanaj u honar čałavieka, jaki ŭznačalvaŭ antyrasiejskaje paŭstańnie, maskvičy zapatrabavali… pierajmienavać jaje. Potym razhladaŭsia varyjant, kab vulicu Kalinoŭskaha «raspałavinić» i pierajmienavać tolki tuju jejnuju častku, dzie mieścicca chram.
Na ščaście, ničoha padobnaha nia stałasia. Varyjant z Usichśviackaj, vyhladaje, zadavoliŭ usich, i tuman, jaki ŭžo zhuściŭsia byŭ nad pryšłaściu vulicy Kalinoŭskaha, raśsiejaŭsia.
Nahadajem, budaŭnictva chramu‑pomniku pačałosia ŭletku 2006 hodu j musić skončycca ŭ śniežni 2008 hodu. Samy vialiki zvon vahoju ŭ piać tonaŭ byŭ adlity ad imia prezydenta Biełarusi. Jašče dva zvany byli ŭźniatyja na zvanicu ad imia patryjarcha maskoŭskaha i ŭsiaje Rusi Aleksija II i mitrapalita mienskaha i słuckaha, patryjaršaha ekzarcha ŭsiaje Biełarusi Fiłareta.
U časie cyrymonii aśviačeńnia zvanoŭ było abjaŭlena, što chram Usich śviatych, vyšynia jakoha budzie siahać 72 metraŭ, uzvodzicca pad patranažam Alaksandra Łukašenki j Aleksija II.