Pjanaja dziaŭčyna za rulom čužoha aŭtamabila ŭčyniła DTZ, u vyniku zahinuŭ ułaśnik mašyny
Upraŭleńniem Śledčaha kamiteta pa Minskaj vobłaści zavieršanaje rasśledavańnie kryminalnaj spravy ŭ dačynieńni da 22-hadovaj dziaŭčyny, jakaja abvinavačvajecca va ŭčynieńni złačynstva, praduhledžanaha č. 4 art. 317 KK, paviedamiła aficyjny pradstaŭnik USK Taćciana Biełanoh.
Nahadajem, nočču 4 červienia žycharka Lubanskaha rajona 1993 hoda naradžeńnia, kirujučy «Opielem-Amiehaj» na aŭtadarozie Kuźmičy — Kamuna ŭ Lubanskim rajonie, nie spraviłasia z kiravańniem, u vyniku čaho aŭtamabil źjechaŭ u pravy pa chodzie ruchu kiuviet i pierakuliŭsia. U DTZ surjozna paciarpieli dva pasažyry, adzin ź jakich (mužčyna 1987 hoda naradžeńnia, ułaśnik aŭtamabila) pamior u miedustanovie.
Z ulikam sabranych padčas papiaredniaha rasśledavańnia źviestak, uklučajučy danyja ekśpiertyz, ustanoŭlena, što abvinavačanaja vykazała złačynnuju niadbajnaść i niaŭvažlivaść. Nie majučy vadzicielskaha paśviedčańnia, jana znachodziłasia za rulom u stanie ałkaholnaha apjanieńnia. Akramia taho, dziaŭčyna adciahnułasia ad kiravańnia transpartnym srodkam, bieručy z ruk pasažyra telefon, u vyniku čaho straciła kantrol za rucham.
Takim čynam, hrubyja parušeńni praviłaŭ darožnaha ruchu źjavilisia pryčynami trahiedyi i stajać ŭ prostaj suviazi z dalejšymi trahičnymi nastupstvami, kanstatavali ŭ śledčych orhanach. Dziejańni abvinavačanaj kvalifikavanyja jak parušeńnie praviłaŭ darožnaha ruchu ŭ stanie ałkaholnaha apjanieńnia, jakoje paciahnuła pa nieaściarožnaści śmierć čałavieka.
Uličvajučy akaličnaści i ciažar učynienaha złačynstva, da abvinavačanaj prymienienaja miera strymańnia ŭ vyhladzie źmiaščeńnia pad vartu. Kryminalnaja sprava pieradadzienaja ŭ prakuraturu dla nakiravańnia ŭ sud.