Departament vykanańnia pakarańniaŭ nie dazvoliŭ jurystu Sapiełku naviedać turmy
Juryst Pavał Sapiełka atrymaŭ adkaz z Departamentu vykanańnia pakarańniaŭ MUS na svoj zvarot, u jakim prasiŭ dazvołu na naviedvańnie miescaŭ prymusovaha ŭtrymańnia z metaju ich manitorynhu.
Takoje prava zamacavanaje ŭ artykule 22 Kryminalna-vykanaŭčaha kodeksu Respubliki Biełaruś: «Pradstaŭniki srodkaŭ masavaj infarmacyi i inšyja asoby majuć prava naviedvać ustanovy, jakija vykonvajuć pakarańnie, pa dazvole administracyi hetych ustanoŭ abo adpaviednych vyšejstajačych orhanaŭ kiravańnia ŭstanovami, jakija vykonvajuć pakarańnie».
Adkaz načalnika Departamenta vykanańnia pakarańniaŭ Siarhieja Daroški, atrymany jurystam 29 lipienia, ździŭlaje adsutnaściu luboj matyvacyi pry admovie jamu ŭ hetym pravie, piša pravaabarončy partał «Viasna».
«Paviedamlaju, što Vaš elektronny zvarot, nakiravany na aficyjny sajt Ministerstva ŭnutranych spraŭ, razhledžany ŭ Departamencie vykanańnia pakarańniaŭ MUS Respubliki Biełaruś.
Naviedvańnie specyjalizavanych ustanoŭ orhanaŭ unutranych spraŭ u ciapierašni čas niemetazhodna.
U vypadku niazhody z hetym adkazam Vy majecie prava jaho abskardzić u paradku, ustanoŭlenym artykułam 20 Zakona Respubliki Biełaruś ad 18.07.2011 № 300-Z «Ab zvarotach hramadzian i jurydyčnych asobaŭ».
Pavieł Sapiełka, kamentujučy hetuju farmalnuju adpisku, adznačaje nastupnaje:
«Pryčyny, pa jakich mnie admovili ŭ naviedvańni miescaŭ prymusovaha ŭtrymańnia, vidavočna, vykładzienyja ŭ samim maim zvarocie. Adkaz Departamenta vykanańnia pakarańniaŭ niematyvavany i siońnia ž budzie mnoj abskardžany ŭ MUS».