Iran hatovy dapamahčy Biełarusi ŭ budaŭnictvie AES
Pra heta siońnia zajaviŭ na pres‑kanferencyi pasoł Iranu ŭ našaj krainie Abdolchamid Fiekry.
Pavodle jaho słoŭ, dapamoha moža być va ŭsich śfierach, takich jak vydzialeńnie finansavych srodkaŭ, navučańnie biełaruskich śpiecyjalistaŭ, abmien vopytam, ustanoŭka abstalavańnia abo navučańnie pracy na im.
Dypłamat zaznačyŭ, što padtrymka iranskaha boku mahčyma pry ŭmovie, kali biełaruski bok aficyjna jaje zapytaje, a ŭ Irana budzie mahčymaść jaje akazać.
Pasoł Irana ličyć, što Biełaruś vałodaje dobrym navukovym i technałahičnym patencyjałam. «Niahledziačy na ciažkaści, što ŭźnikli, Iran adkryŭ novy šlach — mirnaje vykarystańnie jadziernaj enierhii — i hatovy padzialicca svaimi dasiahnieńniami z usimi, chto maje mirnyja mety», — zajaviŭ A.Fiekry.