Pac-Man atakuje Ziamlu
Piksieli
Žanr: fantastyka, kamiedyja, bajavik.
Režysior: Krys Kałambus
U rolach: Adam Sendler, Kievin Džejms, Mišel Monachen, Pitar Dzinklejdž, Džoš Had, Brajan Koks, Mećju Linc, Šon Bin
ZŠA, 106 chv.
Adznaka: 5
U 1982 hodzie, spadziejučysia ŭstalavać kantakt ź inšaziemnaj cyvilizacyjaj, NASA zapuściła infarmacyjnuju kapsułu, jakaja źmiaščaje malunki i kadry ziamnoha žyćcia i kultury. Tym nie mienš inšapłanietniki ŭspryniali pasłańnie jak abviaščeńnie vajny i napadajuć na Ziamlu, vykarystoŭvajučy madeli z arkadnych hulniaŭ 80-ch hadoŭ, uklučajučy Centipede, Pac-Man i Donkey Kong. Prezident Uiljam Kupier źviartajecca da svajho siabra dziacinstva i čempijona pa arkadnych hulniach Sema Breniera. A toj vyrašaje sabrać hrupu retrahiejmieraŭ, kab supraćstajać prychadniam.
U asnovu filma lahła adnajmiennaja karotkamietražnaja stužka francuzskaha režysiora Patryka Žana, u jakoj na Ńju-Jork napadali piersanažy znakamitych arkadnych hulniaŭ — ad Pac-Man da Space Invaders. Režysior Krys Kałambus (try častki «Hary Potera» (2001, 2002, 2004)) i jaho kamanda ŭpadabali hetuju ideju i vyrašyli źniać poŭnamietražny film.
«Vielmi viasioły, zajmalny i pa-sapraŭdnamu maštabny, film vyhladaje jak kłasičny letni błokbastar. Scenar nie padobny ni da jakoha inšaha, naša stužka aryhinalnaja», — adznačyŭ Krys.
Zdymki prachodzili ŭ Taronta (Kanada) i zaniali try miesiacy. Dla zdymak adšukali sotni sapraŭdnych hulniavych aŭtamataŭ i kožny ź ich byŭ adramantavany. Dla kožnaha aŭtamata padbirali patrebnyja nalepki, abnaŭlali korab, ustaŭlali novyja vadkakryštaličnyja dysplei i inšaje elektronnaje načyńnie. Pierš čym patrapić na zdymačnuju placoŭku, kožny hulniavy aŭtamat pavinien byŭ być uchvaleny kampanijaj, jakaja pradstaŭlała na rynku adpaviednuju handlovuju marku.
Nastalhičnaje kino pra arkadnyja hulni 80-ch traplaje ŭ mejnstrym, bo cikavaść da ich ciapier adradžajecca. Film spadabajecca najpierš tym, chto maryć ubačyć lubimyja hulni ŭ novaj jakaści: u vyhladzie ažyłych zachopnikaŭ Ziamli abo skanstrujavanyja ŭ 3d-prastory elemienty interfiejsu. Astatnim ža daviadziecca zadavolicca kamičnymi piersanažami i niajomkimi situacyjami, bo asablivaj intelektualnaj nahruzki film nie niasie.