U vyniku śpiecapieracyi ŭ Mali adzin ukrainiec zahinuŭ, dvoje vyzvalenyja
U Mali ŭ vyniku śpiecapieracyi siłavikoŭ pa vyzvaleńni zakładnikaŭ adzin hramadzianin Ukrainy zahinuŭ, dvoje byli vyratavanyja.
Ab hetym 8 žniŭnia paviedamili ŭ MZS Ukrainy.
«U zakładnikach terarystaŭ, jakija zachapili hatel u Mali, znachodzilisia čaćviora ŭkraincaŭ, adnamu ź jakich udałosia schavacca», - havorycca ŭ paviedamleńni.
Pa papiarednich dadzienych, atrymanych ad malijskaha boku i misii AAN u Mali, u vyniku napadu byli zachoplenyja čaćviora hramadzian Ukrainy, adzin ź jakich zahinuŭ.
«Adnamu z ukraincaŭ udałosia ŭciačy ad tych, chto napadaŭ, ciapier jon znachodzicca na bazie misii AAN u pravincyi Mopci. Dvoje inšych hramadzian byli vyzvalenyja padčas antyterarystyčnaj apieracyi i ciapier znachodziacca ŭ biaśpiecy», - paviedamili ŭ MZS.
U MZS adznačyli, što pasolstva Ukrainy ŭ Ałžyry znachodzicca ŭ pastajannym kantakcie z kampietentnymi orhanami Mali i misijaj AAN z metaj vyśviatleńnia piersanalnych dadzienych zahinułaha hramadzianina Ukrainy i vyśviatleńnia abstavinaŭ jaho hibieli.
«Taksama prymajucca terminovyja miery dla ŭstanaŭleńnia suviazi z vyzvalenymi ŭkraincami z metaj vyznačeńnia ich biahučaha stanu i akazańnia nieabchodnaj konsulskaj dapamohi», - zapeŭnili ŭ MZS.
Jak viadoma, 7 žniŭnia ŭ Mali hrupa bajevikoŭ napała na hatel Byblos, dzie časta pražyvajuć zamiežniki, u tym liku pradstaŭniki misii AAN pa stabilizacyi ŭ Mali. Padčas napadu na hatel byŭ zabity supracoŭnik AAN.
Metaj tych, chto napadaŭ byŭ zachop zakładnikaŭ mienavita ź liku hramadzian zamiežnych dziaržaŭ, jakija pražyvajuć u haścinicy. Pierastrełka z terarystami praciahvałasia ŭsiu noč. Malijskija siły biaśpieki rychtavali śpiecapieracyju pa vyzvaleńni ludziej.
Prylehłyja da haścinicy kvartały byli błakavanyja armijaj i siłami pravaparadku.
U malijskim vajskovym kamandavańni pakul nie padajuć kančatkovych dadzienych ab achviarach napadu bajevikoŭ. Niama taksama padrabiaznaj infarmacyi pra los mirnych hramadzian, jakija znachodzilisia ŭ hateli ŭ momant ataki.