Jarmošyna patłumačyła sakret pośpiechu Karatkievič u zbory podpisaŭ
Staršynia Centrvybarkama Biełarusi ŭ intervju prahramie «Hałoŭny efir» telekanała «Biełaruś 1», pakazanym uviečary 23 žniŭnia, patłumačyła, čamu lidar AHP Anatol Labiedźka i lidar Partyi levych «Spraviadlivy śviet» Siarhiej Kalakin nie zmahli sabrać 100 tysiač podpisaŭ vybarščykaŭ u padtrymku vyłučeńnia kandydatam u prezidenty, a Taćciana Karatkievič — aktyvistka kampanii «Havary praŭdu» — zmahła.
fota Siarhieja Hudzilina
Jarmošyna źviarnuła ŭvahu na toje, što na Labiedźku i Kalakina pracavali «asabistyja partyi i asabistaje, addanaje im atačeńnie». U Karatkievič ža była mahutnaja padtrymka šerahu palityčnych partyj. «Na Karatkievič pracavali zusim roznyja palityčnyja siły», — kanstatavała jana.
«Toje, što jany sabrali podpisy pad bieł-čyrvona-biełym ściaham, pryciahvała da ich, całkam mahčyma, tych ludziej, jakija prytrymlivajucca padobnych pohladaŭ, padobnaj palityčnaj aryjentacyi», — adznačyła kiraŭnik CVK.
«Inšaja. Maładaja simpatyčnaja žančyna. Śviežy tvar, nie źviazany sa skandałami, kampramatam. Jana jašče nikomu nie paśpieła nadakučyć. Jana prosta padabajecca ludziam. Ja dumaju, što moładzi pryjemna, što ŭ ich źjaviŭsia małady lidar, nie źviazany sa staroj namienkłaturaj. I kampaniju jana svaju pravodziła vielmi intelihientna: nikoha nie abvinavačvajučy, nikoha nie abražajučy. U jaje ŭmieranaja rytoryka», — acaniła Karatkievič Jarmošyna.
Pry hetym nahadała, što Karatkievič źjaŭlajecca členam «toj samaj partyi, jakaja brała Zimni (Dom urada.) U śniežni 2010 hoda».