Pajšoŭ a 10-j ranicy i nie viarnuŭsia: śledčyja vyśviatlajuć abstaviny hibieli 8-hadovaha chłopčyka
U Rahačoŭskim rajonie na miescy vyjaŭleńnia cieła vaśmihadovaha chłopčyka, jaki 21 žniŭnia źnik bieź viestak u vioscy Kraśnica, pracuje śledča-apieratyŭnaja hrupa. Śledčyja adpracoŭvajuć niekalki viersij hibieli dziciaci, u tym liku kryminalnaha charaktaru, paviedamlaje pres-słužba SK pa Homielskaj vobłaści.
Dzicia baviła letnija kanikuły ŭ babuli. Apošni raz piensijanierka bačyła ŭnuka na vulicy kala doma prykładna ŭ 10.00. U druhoj pałovie dnia, kali dzicia nie viarnułasia damoŭ, svajaki razam z adnaviaskoŭcami pačali jaho šukać.
Camastojna ŭstanavić miescaznachodžańnie chłopčyka nie ŭdałosia, i nastupnaj ranicaj maci źnikłaha źviarnułasia pa dapamohu ŭ pravaachoŭnyja orhany.
Da pošukavych mierapryjemstvaŭ akramia supracoŭnikaŭ orhanaŭ unutranych spraŭ dałučylisia supracoŭniki RANS, «Asvoda», rajonnaha adździeła adukacyi, rabotniki lashasa, vałanciory. Jany pračesvali vioski, abśledavali pali, lasy, aziory.
Cieła chłopčyka znajšli tut, sk.gov.by
23 žniŭnia ŭ kanalizacyjnym adstojniku było znojdzienaje cieła dziciaci, poŭnaściu pahružanaje pad vadu.
Pavodle papiaredniaha zaklučeńnia ekśpierta, śmierć nastupiła ŭ vyniku ŭtapleńnia. Dla ŭstanaŭleńnia dakładnaj pryčyny śmierci pryznačanaja sudova-miedycynskaja ekśpiertyza.
Pry pieršym ahladzie miesca zdareńnia ŭstanoŭlena, što zbudavańnie z kanalizacyjnymi vodami ŭjaŭlaje saboju kałodziež dyjamietram 6 mietraŭ i hłybinioj prykładna 5 mietraŭ, praktyčna na ŭsiu hłybiniu ŭmantavany ŭ ziamlu. Pavierchnia zbudavańnia nakrytaja bietonnymi plitami. U centry reziervuara raźmieščanaja techničnaja adtulina šyrynioj 1 mietr, pryznačanaja dla vizualnaha nazirańnia za ŭzroŭniem napaŭnieńnia reziervuara. Prajom pamiž plitami aharodžany mietaličnymi prutami. Reziervuar uvachodzić u sistemu filtravańnia paloŭ i znachodzicca na bałansie KŽEUP «Rahačoŭ».
Śledčyja adpracoŭvajuć niekalki viersij hibieli dziciaci. Razhladajecca jak kryminalny charaktar taho, što adbyłosia, tak i viersija niaščasnaha vypadku.
Bieražycie dziaciej, dadali ŭ Śledčym kamitecie.