Biełaruś moža atrymać pieršy tranš kredytu JEFSR da kanca 2015 hoda
Jeŭrazijski fond stabilizacyi i raźvićcia (JEFSR) moža vydzielić Biełarusi pieršy tranš stabilizacyjnaha kredytu da kanca hetaha hoda, zajaviŭ pradstaŭnik Jeŭrazijskaha banka raźvićcia Ališer Mirzojeŭ.
Misija ekśpiertaŭ JEABR znachodziłasia ŭ Biełarusi hetymi dniami i abmiarkoŭvała ŭmovy vydzialeńnia krainie stabilizacyjnaha kredytu.
«Zaklučeńnie, dapracavanaje z ulikam rekamiendacyj savieta fondu, budzie razhledžanaje ŭ čaćviortym kvartale hetaha hoda. U vypadku stanoŭčaha rašeńnia pieršy tranš moža być vydzieleny da kanca hetaha hoda», — zajaviŭ Mirzojeŭ viečaram 31 žniŭnia ŭ efiry telekanała «Biełaruś 1».
U sakaviku 2015 hoda Biełaruś źviarnułasia ŭ JEFSR z zajaŭkaj na atrymańnie novaha kredytu na 3 młrd. dołaraŭ. 3 lipienia saviet fondu daručyŭ dapracavać matrycu ekanamičnych mier, jakimi kraina pavinna budzie kiravacca ŭ vypadku atrymańnia kredytu fondu.
4 žniŭnia staršynia praŭleńnia Nacyjanalnaha banka Pavieł Kałaŭr zajaviŭ, što kančatkovaja suma kredytu, jakuju Biełaruś moža atrymać u JEFSR, pakul nie vyznačanaja. «Zajaŭka pieršapačatkova była na 3 młrd dołaraŭ, heta miežavy ŭzrovień, jaki tearetyčna moh być zadavoleny, ale kankretnyja ličby zaležać ad šerahu faktaraŭ, u tym liku ad mahčymaściaŭ Jeŭrazijskaha fondu», — adznačyŭ Kałaŭr.
Napiaredadni vizitu misii staršynia praŭleńnia Jeŭrazijskaha banka raźvićcia, jakija kiruje srodkami JEFSR, Dźmitryj Pankin adznačaŭ: «My płanujem, što 24—28 žniŭnia ŭ Biełaruś na pieramovy z uradam pryjedzie misija našych ekśpiertaŭ. Tam my płanujem detalovuju razmovu pa kožnym pakazčyku. Valutnyja reziervy: što vykanana abo nie vykanana, jakija zastajucca roznahałośsi, abjom kredytavańnia ekanomiki, jaki ŭzrovień kampiensavańnia taryfaŭ na ŽKH, kampiensavańnia transpartnych taryfaŭ. Takaja razmova budzie. Ja spadziajusia, što my zdolejem znajści kampramis».