Dzie samy tanny ŭ śviecie internet?
Raptoŭna, u vorahaŭ internetu.
Rasijskaje infarmacyjna-analityčnaje ahienctva Content Review paraŭnała ceny na mabilny internet u 50 krainach śvietu z najbolšym VUP. Niečakana, ale samy tanny internet znajšoŭsia ŭ Iranie — krainie, što dahetul ličycca voraham internetu. Na druhim miescy Pakistan, na trecim — Rasija (taksama vorah internetu).
Try hihabajty mabilnaha internet-trafiku (prykładna stolki sioleta ŭ siarednim spažyvaje abanient) kaštujuć u iranskaha apieratara Hamrah-e-Avval pryblizna 10 500 biełaruskich rubloŭ, u rasijskaha Miehafona — 91,7 tysiač. Ź biełaruskich apierataraŭ samaja tannaja prapanova ŭ life:) — 46,8 tysiač za 3 Hb.
Biełaruś nie trapiła ŭ daśledavańnie praz mały VUP. U 50-j pa hetym pakaźniku krainie, Vieniesuele VUP na 2014 hod składaŭ 205,7 młrd dalaraŭ, u Biełarusi na kaniec 2014 hoda — 76,14 młrd.
Kali padstavić u rejtynh prapanovu life:), to Biełaruś paciaśnić Rasiju i zojmie druhoje za Iranam miesca. U inšych apierataraŭ ceny vyšej — pakiet na 3 Hb kaštuje ŭ velcom 96,9 tysiač (dla niekatorych taryfaŭ 124,9 tysiač), a ŭ MTS kaštavaŭ by kala 69 tysiač (apieratar prapanuje pakiety na 2 i 4 Hb za 60 i 78 tysiač adpaviedna).
U daśledavańni Content Review suśvietny lidar pa VUP, Złučanyja Štaty, zajmaje tolki 33-je miesca z 417,6 tysiač za 3 Hb mabilnaha internetu ŭ Verizon. Kitajski China Mobile na 19-m miescy z 290 tysiačami za 3 Hb, Japonija na 47-m miescy z 726,5 tysiač u NTT DoCoMo, antylidar rejtynhu — Ałžyr z 1,58 młn za 3 Hb u Djezzy.
Daśledčyki razhladali tolki samastojnyja internet-pakiety, što dałučajucca da biahučaha asnoŭnaha taryfu biez uliku ŭklučanaha ŭ taryf trafiku. Heta moža krychu zabłytać čytača — mienavita stolki abanient nie zapłocić (dy i ceny na stacyjanarny internet vielmi adroźnivajucca ad mabilnaha).
Naprykład, u life:) kab padklučyć sabie 3 Hb, treba płacić za luby asnoŭny taryf (minimalny, XS, kaštuje 28,8 tysiač na miesiac). Heta značyć, minimum za 3 Hb mabilnaha internetu daviadziecca zapłacić 75,6 tysiač.
U velcom jość taryf Smart 3, dzie razam ź biaspłatnymi chvilinami i bieźlimitam na lubimyja numary prapanujecca 3 Hb trafika za 149,9 tysiač, ale pa akcyi — 74,95). U MTS minimalny taryf dla 3G-mademaŭ (biez telefanavańniaŭ) — 61,5 tysiač za 4 Hb. Pravajdary chatniaha internetu ŭ asnoŭnym nie prapanujuć limitavanyja pa trafiku taryfy, a tym bolš nastolki maleńkija. Ale, naprykład, u byfly archiŭny taryf na 3 Hb kaštuje 48 tysiač na miesiac (samy tanny z aktualnych — 75,9 tysiač za 10 Hb).