Što kažuć u Rahačovie pra aryštavanaha staršyniu rajvykankama FOTA
Pavodle niezaležnaha partału «Rahačoŭ anłajn», Siarhieja Jakaŭleva aryštavali ŭ jaho domie praź niekalki hadzin paśla śviatočnaj liniejki ŭ SŠ №6, na jakoj jon prysutničaŭ u jakaści «hanarovaha» hościa: «Kiraŭnika horada aryštavali doma, prykładna ŭ 19:20».
Pavodle śledztva, staršynia Rahačoŭskaha rajvykankama, kali budavaŭ pryvatnaje žyllo, zahadvaŭ padnačalenym jamu arhanizacyjam pieradavać jamu tavarna-materyjalnyja kaštoŭnaści pa zanižanaj canie, a taksama pradstaŭlać pasłuhi biaz poŭnaj apłaty.
Rahačoŭski rajvykankam apošnija dva hady ŭznačalvaŭ Siarhiej Jakaŭleŭ.
Što kažuć miascovyja žychary pra mahčymuju datyčnaść jaho da karupcyi, pra styl kiravańnia i imaviernyja pryčyny kryminalnaha pieraśledu?
Hramadzki aktyvist, redaktar partału «Rahačoŭ anłajn» Dzianis Daškievič zhadaŭ, što pieršyja źviestki pra mahčymy aryšt Siarhieja Jakaŭleva ŭ Rahačovie źjavilisia jašče ŭ červieni ŭ suviazi sa spravaj inšaha padazravanaha ŭ karupcyi čynoŭnika, byłoha namieśnika staršyni Homielskaha abłvykankamu Viktara Bančuka.
«Bančuk ža ad nas «pajšoŭ» u Homiel. U Rahačovie jon dva hady tamu byŭ staršynioj rajvykankamu, da pryznačeńnia Siarhieja Jakaŭleva.
Ciapier kažuć, što Bančuk pačaŭ supracoŭničać sa śledztvam, aktyŭna daje pakazańni, u tym liku i na byłych kalehaŭ. Jaho pryvozili ŭ Rahačoŭ na śledčyja dziejańni, vadzili pa horadzie, u tym liku pa centry, dzie pavinny byli zrabić park. Hrošy na park vydzielili vialikija, ale ničoha nie pabudavali, tolki jamu vykapali.
A voś i hety park. Fota «Rahačoŭ anłajn»
Tamu nia vyklučana, što ŭ spravie Jakaŭleva buduć i inšyja epizody, a nia tolki dom, jaki jon buduje. Darečy, dom hety nia nadta i vialiki, dva pavierchi, u mikrarajonie Zadrućcie. A žyŭ jon u viedamasnym domie, dzie raniej žyŭ Bančuk — toj dom dobry, vialiki, za aharodžaj, z sadam. Ale voś vyrašyŭ jašče i svoj pabudavać. Adnak, pavodle našych źviestak, tam nie takija i vialikija sumy jamu inkryminujuć».
Čamu na čynoŭnika vyrašyli zavieści kryminalnuju spravu, a nia prosta adpravili ŭ adstaŭku? Dzianis Daškievič nie vyklučaje, što hetak centralnaja ŭłada advodzić ad siabie ŭsio bolšaje niezadavalnieńnie žycharoŭ rajonu.
«Ludzi ŭzłavanyja, bo faktyčna stajać usie pradpryjemstvy — 90% užo nie pracujuć.
Meblevaja fabryka całkam spynienaja, cahlany zavod — źniščany, na «Dyjaprajektary» raniej pracavała kala 5 tysiač pracaŭnikoŭ — ciapier kala tysiačy. Skaračeńni iduć na miascovym małočnym kambinacie, zarobki ŭ ludziej upali ŭ niekalki razoŭ. U horadzie vialikija prablemy ź infrastrukturaj — navat niama vialikaj kramy. Pačali budavać handlovy centar, ale ŭžo 3 hady nia mohuć dabudavać. Voś z usich hetych cahlinak i składajecca niezadavalnieńnie. Pryčym, vidać, niezadavalnieńnie idzie na adras i pavažanaha prezydenta, tamu vyrašyli hetak pieranakiravać hnieŭ ludziej».
Miascovy hramadzki aktyvist Uładzimier Mielnikaŭ kaža, što admoŭnych momantaŭ u pracy Siarhieja Jakaŭleva ŭ Rahačoŭskim rajvykankamie chapała.
«Pra jaho na pasadzie da pryznačeńnia ŭ Rahačoŭ kazali, što pryncypovy čałaviek, patrabavalny, punktualny.
A tut užo stali kazać, što nibyta chamavaty, moh i brydkasłović, i prynizić. Raskazvajuć, što niejak na žančynu kazaŭ pry ŭsich, što «…pastavić».
Nie prysutničaŭ pry hetym, tamu dakładna nia viedaju, ci tak było. Ale ž heta ahulnaja tendencyja. I voś akazałasia, što i domik niejki… Nu, jak zaŭsiody».
Pavodle Ŭładzimiera Mielnikava, u Rahačovie ŭžo šmat hadoŭ nie było nijakich apazycyjnych akcyjaŭ. «Zapužali ludziej, zaciukali hetak, što nichto ŭžo i nie źviartajecca, dyj miesca praviadzieńnia akcyjaŭ dahetul nia vyznačyli. Na miascovych vybarach dva hady tamu išło čałaviek 5 niezaležnych kandydataŭ. Nie apazycyjanery, a prosta ludzi nie ad ułady, pensijanery, jakija ich by choć mahli pakrytykavać. Dyk nikoha nie prapuścili. Manipulujuć vynikami, jak chočuć. Naš miascovy aktyvist Uładzimier Tamkovič złaviŭ ich za ruku, vykłaŭ u internet, jak nasamreč było na tych vybarach. Što pavodle pratakołu na daterminovaje hałasavańnie pryjšło 307, a napisali — 640. U dzień asnoŭnaha hałasavańnia pryjšło 485, a 615 napisali. Tamkovič pajšoŭ da prakurora, kab praviali pravierku. Praviali i dałažyli, što nibyta ŭsio narmalna. I jaki vynik? A voś jaki.
Što robić ułada, jakuju pryznačajuć źvierchu? Zajmajecca karupcyjaj. Kali budziem ich abirać, dyk buduć padkantrolnyja. A tak jon budzie ŭsich dalej pasyłać i ŭ pozu «stavić» tuju žančynu».