Sikorski: Kab paźbiehnuć rasijskaha ŭvarvańnia, procitankavaje ŭzbrajeńnie pavinna być pablizu, u Polščy ci Rumynii, i treba, kab Pucin heta razumieŭ
Krainy Zachadu pavinny raźmiaścić pablizu Ukrainy procitankavyja ŭzbrajeńni, kab dapamahčy ŭ vypadku dalejšaha nastupu rasijskich sił na jaje terytoryju.
Pra heta padčas dyskusii na dvanaccataj štohadovaj sustrečy Jałcinskaj Jeŭrapiejskaj Stratehii (YES) u Kijevie zajaviŭ člen parłamienta Polščy, eks-ministr zamiežnych spraŭ Radasłaŭ Sikorski.
«Supraćtankavaje ŭzbrajeńnie pavinna być dzieści pablizu Ukrainy, u Polščy ci Rumynii. Kali prarasijskija siły abo rasijskija siły zojduć hłybiej na terytoryju Ukrainy, to heta ŭzbrajeńnie vielmi chutka, na praciahu hadziny, pastupić va Ukrainu. Treba, kab prezident Pucin heta razumieŭ», — padkreśliŭ palityk.
U svaju čarhu były premjer-ministr Danii, eks-hienieralny sakratar NATA Anders Foh Rasmusen, adznačyŭ, što płan «A» — mirnaje raźvićcio padziej va Ukrainie, ale kali budzie jasna, što «Rasija i sieparatysty nie spyniać ahoń, pryjdzie čas, i zachodnija nacyi daduć zbroju Ukrainie». Akramia taho, pavodle jaho słoŭ, Kijevu varta praciahvać praviadzieńnie reformaŭ.
«Treba dalej pracavać nad reformami. U pryvatnaści, rašuča zmahacca z karupcyjaj, pravodzić reformu sudavodstva, u halinie enierhietyki, dziaržaŭnaha budaŭnictva, derehulacyju», — zajaviŭ Rasmusen.
Havoračy ab padtrymcy Kijeva krainami Jeŭropy ministr zamiežnych i jeŭrapiejskich spraŭ Vialikaha Hiercahstva Luksiemburh Žan Asielborn adznačyŭ, što na fonie prablemy biežancaŭ pra Ukrainu stali ŭzhadvać radziej, adnak heta nie treba ŭsprymać, jak adsutnaść padtrymki.
«Niahledziačy na heta, pavinien skazać: jość adzinstva i zhurtavanaść pa Ukrainie, jak nikoli Vy viedajecie, što była vialikaja dyskusija pra praciah sankcyjaŭ (suprać Rasii), ale ŭ vyniku ich usio ž praciahnuli da 2016 hoda», - padkreśliŭ jon.