AES razvalić usiu ekanomiku krainy
Hetak ličyć kandydat techničnych navuk, hałoŭny technolah vytvorča‑techničnaha adździeła RUP «BiełNDPIenierhapram» Viktar Juško.
Hrupa biełaruskich vučonych zaniepakojena vierahodnaściu taho, što z pačatkam budaŭnictva AES u Biełarusi inšyja kirunki enierhietyki nie buduć raźvivacca. Taki punkt hledžańnia vykazaŭ na kruhłym stale 9 sakavika kandydat techničnych navuk, hałoŭny technołah vytvorča‑techničnaha adździeła RUP «BiełNDPIenierhapram» Viktar Juško.
Na dumku vučonaha, budaŭnictva AES u Biełarusi — heta «palityka na zahnivańnie».
«Da 2020 hoda my zapuścim atamnuju stancyju. Narmalna funkcyjanavać jana nie zmoža, tamu što da taho času jadziernaje paliva ŭ śviecie budzie na zychodzie. Inšyja ž kirunki enierhietyki my nie raźvivali, tamu što ŭsie srodki byli puščany na AES. Razvalicca ŭsia ekanomika respubliki, usia enierhietyka», — zaznačyŭ V.Juško.
Jon ličyć, što «tannaść atamnaj enierhii — heta mif». «Hetyja śćviardžeńni byli abhruntavanyja ŭ kancy 1990‑ch — pačatku 2000‑ch hadoŭ. Adnak za apošnija siem hadoŭ jadziernaje paliva padaražeła ŭ 21 raz. Paraŭnajem, haz — usiaho ŭ try razy», — padkreśliŭ vučony. Tamu elektraenierhija, što vypracoŭvajecca na AES, z kožnym hodam robicca ŭsio daražejšaj i daražejšaj. Realny košt atamnaj elektraenierhii, pavodle jaho słoŭ, u piać razoŭ vyšejšy za košt elektraenierhii ciepłavych stancyj.
Vučony pryvioŭ źviestki Sibirskaha adździaleńnia Rasijskaj akadeimii navuk ab tym, što «raźvićcio jadziernaj enierhietyki na reaktary ź ciepłavymi niejtronami bieśpierśpiektyŭnaje».
«Zhodna ź ich daśledavańniami, da 2020—2025 hadoŭ na 50% AES nie budzie chapać jadziernaha paliva, a da 2050 hoda jaho naohuł nie budzie, bo zapasy pryrodnaha ŭranu abmiežavanyja i da taho buduć vyčarpanyja», — skazaŭ jon.
V.Juško padkreśliŭ, što z navukovaha i praktyčnaha punktu hledžańnia siońnia bolš metazhodna ŭkładvać srodki «ŭ bolš pierśpiektyŭnyja kirunki ŭ enierhietycy», naprykład u vietraenierhietyku. Pavodle jaho słoŭ, raspracavanaja im prahrama pa raźvićci alternatyŭnych krynicaŭ enierhii maje na mecie da 2020 hoda poŭnaściu zamiaścić atamnuju elektraenierhiju alternatyŭnymi krynicami enierhii.