ZVR Biełarusi ŭ kastryčniku vyraśli na $38,1 młn
Pa vynikach kastryčnika zołatavalutnyja reziervy Respubliki Biełaruś u vyznačeńni standartu MVF pavialičylisia na 38,1 młn. dołaraŭ ZŠA i, pavodle papiarednich źviestak, 1 listapada 2015 hoda skłali 4 młrd. 666,7 młn. dołaraŭ ZŠA ŭ ekvivalencie.
Jak patłumačyli ŭ Nacbanku, padtrymańniu zołatavalutnych reziervaŭ sadziejničali pastupleńnie srodkaŭ ad prodažu Ministerstvam finansaŭ i Nacyjanalnym bankam ablihacyj, naminavanych u zamiežnaj valucie, kupla hałoŭnym bankam krainy zamiežnaj valuty na tarhach AAT «Biełaruskaja valutna-fondavaja birža», a taksama pastupleńni ad źbirańnia ekspartnych pošlin na naftapradukty.
Admoŭny ŭpłyŭ na abjom zołatavalutnych reziervaŭ u asnoŭnym akazali pahašeńnie ŭradam i Nacbankam źniešnich i ŭnutranych abaviazacielstvaŭ u zamiežnaj valucie ŭ poŭnym abjomie, a taksama pamianšeńnie koštu zołata na mižnarodnym rynku kaštoŭnych mietałaŭ.
U žniŭni na pres-kanfierencyi ŭ Minsku kiraŭnik Nacbanka Pavieł Kałaur zajaviŭ, što da kanca 2015 hoda abjom zołatavalutnych reziervaŭ Biełarusi zachavajecca na ciapierašnim uzroŭni, jaki składaje kala 4,7 młrd. dołaraŭ.
U nacyjanalnym vyznačeńni abjom zołatavalutnych reziervaŭ pavialičyŭsia na 117,8 młn. dołaraŭ i na 1 listapada skłaŭ 5 młrd. 159,8 młn. dołaraŭ ZŠA ŭ ekvivalencie. U skład ZVR u nacyjanalnym vyznačeńni dadatkova ŭklučajucca reziervovyja aktyvy ŭ rasijskich rublach i kitajskich juaniach, a taksama kaštoŭnyja kamiani i roznyja vidy kaštoŭnych mietałaŭ.