Biełarusy ŭziali ŭdzieł u adkryćci ŭ Vašynhtonie miemaryjału achviaram Haładamoru FOTY
U subotu, 7 listapada, u Vašynhtonie adbyłasia admietnaja padzieja, paśla jakoj u stalicy ZŠA aficyjna isnuje pamiatka pra adnu z trahičnych staronak XX st. — Haładamor va Ukrainie ŭ 1932-33 hadoch. U hety dzień adbyłasia ŭračystaja cyrymonija adkryćcia Miemaryjała pamiaci achviaraŭ Haładamoru.
Padčas mitynhu vystupili pradstaŭniki amerykanskich uładaŭ, dziejačy ukrainskaj emihracyi, z Ukrainy pryjechała žonka prezydenta Maryna Parašenka, było pakazana videa z pryvitalnym słovam Piatra Parašenki.
Na ŭračystaść źjechalisia ŭkraincy z cełaj Ameryki, ź Ńju-Jorku taksama prysutničała vialikaja hramada. BAZA atrymała zaprašeńnie pryniać udzieł i naša delehacyja ŭskładzie 15 asobaŭ razam z ukraincami ź Ńju-Jorku taksama vyjechała ŭ Vašynhton. My ličyli patrebnym padtrymać našych susiedziaŭ i raździalić ź imi radaść i smutak. Staralisia my jak najbolš vyrazna pradstavić našu prysutnaść na mitynhu, razharnuli vialiki bieł-čyrvona -bieły ściah, zrabili plakat z Pahoniaju i nadpisam «Biełaruś». Tak što abyjści ŭvahaju našu hrupu było amal niemahčyma, šmat ludziej padychodzili, pytalisia, rabili fota. Tam my sustreli daŭniaha siabra biełarusaŭ - amerykanskaha dyplamata i vydatnaha fatohrafa Džona Kunstadara, jaki taksama naviedaŭ uračystaść.
My byli pryjemna ŭražanyja, jak dobra ŭsio było arhanizavana, jak było ŭsio zručna zroblena dla ludziej, jak uračysta i ŭźniosła adbyvałasia cyrymonija. Spadabaŭsia i sam Miemaryjał, jaki ŭjaŭlaje saboju ścianu daŭžynioju 10 m. sa stylizavanymi pšaničnymi kałasami na joj. Kałośsie, jak symbal uradlivych ukrainskich paloŭ, nadavała asablivaje hučańnie trahiedyi. Bahaty ŭradžaj i hoład — dźvie niesumiaščalnyja rečy mahli być ab́jadnanyja tolki złoj volaju tych, chto złamysna spravakavaŭ Haładamor.
Varta paradavacca za ukraincaŭ, za ich salidarnaść, za ich vysokuju samaśviadomaść, za ich adkaznaść pierad svajoj krainaj, historyju jakoj jany viartajuć z zabyćcia. Ahulnymi vysiłkami jany zdoleli adnavić i ŭšanavać pamiać pra achviaraŭ Haładamoru, pastavili im pomnik u Kijevie i ciapier ŭ centry stalicy ZŠA, hetuju pamiać užo nie ścierci. My bačyli vakoł siabie ludziej u vyšyvankach, z aduchoŭlenymi, natchnionymi tvarami. Vierycca, što i siońniašniuju biadu ŭkrainskaja nacyja pieraadoleje i pabuduje novaje bolš ščaślivaje žyćcio.