Zavieršana rasśledavańnie spravy ab žorstkim zabojstvie dźviuch supracoŭnic firmy ich kaleham u Homieli
Rasśledavańnie kryminalnaj spravy ŭ dačynieńni da 33-hadovaha mužčyny, abvinavačanaha ŭ žorstkim zabojstvie dźviuch žančyn u Homieli, zavieršana, paviedamili ŭ Śledčym kamitecie Biełarusi.
Jak paviedamlałasia, pieršaj achviaraj fihuranta stała dziaŭčyna 1990 hoda naradžeńnia. Pa viersii pravaachoŭnikaŭ, jaje zabojstva, spałučanaje z vykradańniem i zhvałtavańniem, jon ździejśniŭ u lipieni 2014 hoda. Doŭhi čas raskryć heta złačynstva i zatrymać vinavataha nie ŭdavałasia, bo mužčyna staranna schavaŭ usie ślady itrup. Praz amal hod u Homieli pry anałahičnych abstavinach źnikła, a zatym była zabitaja jašče adna žančyna 1988 hoda naradžeńnia. Tady śledčyja razam ź milicyjantami vyjavili, što abiedźvie paciarpiełyja pracavali na adnym pradpryjemstvie i źnikli ŭ adnym i tym ža miescy. Pa padazreńni zatrymali mužčynu, jaki taksama byŭ supracoŭnikam hetaj arhanizacyi i viedaŭ žančyn.
Vyśvietliłasia, što fihurant padmanam zaciahvaŭ achviar da siabie ŭ aŭtamabil, zatym vioz ich u svoj haraž, dzie utrymlivaŭ i hvałtavaŭ. Žadajučy schavać svaje dziejańni, abvinavačany zabivaŭ žančyn, nanosiačy množnyja ŭdary tupymi pradmietami, a taksama adziavajučy na hałavu polietylenavy pakiet. Trupy jon vyvoziŭ na mašynie i zakopvaŭ u lasnym masivie ŭ Homielskim rajonie. Rečami paciarpiełych na sumu kala Br22 młn mužčyna rasparadziŭsia pa svaim mierkavańni.
Pa kryminalnaj spravie było praviedziena bolš za 50 ekśpiertyz i dapytana kala 200 śviedak. Fihurantu pradjaŭlena kančatkovaje abvinavačańnie pa č.2 art.139 (zabojstva), č.1 i č.2 art.166 (zhvałtavańnie), č.2 art.167 (hvałtoŭnyja dziejańni sieksualnaha charaktaru), č.1 st.182 (vykradańnie čałavieka), č.1 i č.2 art.205 (kradziež) Kryminalnaha kodeksa Biełarusi.