Novy siezon premii Hiedrojca adkryty
Biełaruski PEN-centr, Sajuz biełaruskich piśmieńnikaŭ, Pasolstva Respubliki Polšča ŭ Respublicy Biełaruś i Polski Instytut u Minsku abviaščajuć piaty siezon Litaraturnaj premii imia Ježy Hiedrojca.
Sioleta žury premii budzie pracavać pavodle novaha pryncypu: asnoŭnyja rašeńni buduć prymacca zhodna z kansensusam. Hałasavańniem buduć vyrašacca tolki sprečnyja pytańni pa doŭhim i karotkim śpisach, pieramožcy ž buduć vyznačacca tolki kansensusam siabraŭ žury. Siabry žury składuć farmuloŭku, za što knizie prysudžajecca I miesca. Žury premii budzie nazvanaje ŭ śniežni.
Uznaharody, jakija čakajuć troch najlepšych, pavodle mierkavańnia žury, prazaikaŭ:
— ček na sumu, ekvivalentnuju 10 000 jeŭra, ad «Ideja Bank» — dla pieršaha miesca;
— tvorčaja stypiendyja ŭ Domie tvorčaści piśmieńnikaŭ (h. Viśbiu, Hotłand, Šviecyja) — dla druhoha miesca;
— tvorčaja stypiendyja ŭ Vientśpiłsie (Łatvija) — dla treciaha miesca.
Knihi dla ŭdziełu ŭ konkursie možna dasłać da 31 studzienia 2016 hoda praz aficyjny sajt Premii, na paštovy adras: 220050, Minsk, p/s 218, a taksama na elektronny adras: info@pen-centre.by. Zajaŭka musić utrymlivać nastupnyja źviestki:
a) infarmacyja pra naminatara, što vyłučaje tvor na Premiju: kantaktnyja numary telefonaŭ i adrasy;
b) karotkaja tvorčaja bijahrafija aŭtara albo ŭsich suaŭtaraŭ, kali tvor napisany ŭ suaŭtarstvie;
v) anatacyja knihi;
h) uryvak da 10 tysiačaŭ znakaŭ, jaki budzie raźmieščany na sajcie Premii;
d) pažadana — adrasy kramaŭ, dzie možna nabyć knihu, ci spasyłki, pa jakich jaje možna spampavać u elektronnym varyjancie.
Da zajaŭki nieabchodna dałučyć 7 asobnikaŭ u papiarovym i 1 asobnik u elektronnym varyjancie. Zajaŭki biez elektronnaj viersii i 7 asobnikaŭ knihi prymacca da ŭdziełu ŭ konkursie nie buduć.
Premija imia Ježy Hiedrojca ŭručajecca z 2012 hoda. Papiarednija pieramožcy Premii: Pavał Kaściukievič z knihaj «Zbornaja RB pa niehałoŭnych vidach sportu» (2012), Uładzimir Niaklajeŭ z knihaj «Aŭtamat z haziroŭkaj ź siropam i biez» (2013), Ihar Babkoŭ z knihaj «Chvilinka: Try historyi» (2014), Viktar Kaźko z knihaj «Čas źbirać kości» (2015).