U śpisie pretendentaŭ na pasadu hałoŭnaha treniera CHK «Dynama-Minsk» — try śpiecyjalisty
Ciapier u śpisie pretendentaŭ na pasadu hałoŭnaha treniera CHK «Dynama-Minsk», jaki vystupaje ŭ Kantynientalnaj chakiejnaj lizie, znachodziacca try śpiecyjalisty.
Pra heta zajaviŭ staršynia Biełaruskaj fiederacyi chakieja Ihar Račkoŭski ŭ intervju prahramie «Kontury» telekanała ONT, pakazanym viečaram 29 listapada.
«My šukajem roznyja varyjanty. U nas jość śpis kandydataŭ. Litaralna ŭčora my z dyrektaram minskaha «Dynama» sieli, proźviščaŭ 15 u nas jość, i my prosta siadzim i vykreślivajem… Zastałosia try», — raskazaŭ Račkoŭski.
Nazyvać proźviščy hetych kandydataŭ jon ličyć pakul niekarektnym.
«Majo mierkavańnie — pavinien być dobry śpiecyjalist i, ja padkreśliŭ by, — paŭnočnaamierykanski», — zajaviŭ kiraŭnik FCHRB.
Ciapier vykanaŭcam abaviazkaŭ hałoŭnaha treniera minskaha «Dynama» źjaŭlajecca viadomy biełaruski chakieist Andrej Kavaloŭ. U rula kamandy jon ustaŭ paśla skasavańnia kantrakta sa słavakam Lubamiram Pokavičam.
Pokavič uznačaliŭ «Dynama» 23 listapada 2013 hoda, źmianiŭšy Alaksandra Andryjeŭskaha. U siezonie-2013/2014 kamanda nie trapiła ŭ płej-of, ale dajšła da finału Kubka nadziei, jaki razyhryvali niaŭdačniki rehularnaha čempijanatu. U siezonie-2014/2015 «Dynama» vyjšła ŭ płej-of, dzie ŭ pieršym raŭndzie prajhrała finskamu «Jokierytu».