Byłaja Partyja rehijonaŭ pierakanaŭča pieramahaje ŭ Maryupali
Na vybarach u pryfrantavym Maryupali (Danieckaja vobłaść) absalutna pieramahaje Apazicyjny błok. Taki vynik daje ekzit-poł. Apabłok byŭ stvorany na razvalinach byłoj Partyi rehijonaŭ eks-prezidenta Janukoviča.
Apabłok nabiraje kala 66% hałasoŭ. Prajeŭrapiejskija partyi razam źbirajuć tolki kala 24%, ale ŭ haradskuju radu moža prajści tolki adna ź ich, bo jany išli na vybary paasobku. U pryvatnaści, «Baćkaŭščyna», «Samapomač», «Błok Piatra Parašenki» i «Ukrop» nabirajuć kala 3% kožnaja, što mienš za prachadny barjer, a «Svaboda» apynułasia nižej za barjer statystyčnaj pamyłki. 10% nabiraje tolki hramadzianskaja inicyjatyva «Siła ludziej», jana i stvoryć alternatyŭnuju siłu ŭ radzie.
Na vybarach mera taksama pieramahaje kandydat Apabłoka.
Najbolšyja zavody Maryupala naležać ukrainskamu multymiljarderu Rynatu Achmietavu. Jon ža i finansuje miascovy Apazicyjny błok.
Hetaja partyja vystupaje za zachavańnie isnaj sistemy ekanamičnych i palityčnych adnosin, a taksama statusa rasiejskaj movy i kultury.
Maryupal — stratehična važny port na bierazie Azoŭskaha mora. U horadzie pracujuć vializnyja mietałurhičnyja zavody. U krasaviku 2014 horad zachapili rasijskija siły, adnak u červieni ŭkraincy jaho vyzvalili. Linija frontu prachodzić za niekalki kiłamietraŭ na ŭschod ad horada. Uletku 2014 i ŭzimku 2015 horad pieražyŭ mocnyja artyleryjskija abstreły.
Varta adznačyć, što kampanija, jakaja pravodziła ekzit-poł, addaŭna pracavała na zamovu Partyi rehijonaŭ. Realnyja vyniki mohuć akazacca trochi lepšymi dla prajeŭrapiejskich siłaŭ.