Kryminalny artykuł suprać hraficista Maksima Piakarskaha pierakvalifikavali na bolš miakki
Siońnia adzin ź fihurantaŭ kryminalnaj spravy ab patryjatyčnych hrafici Maksim Piakarski chadziŭ na dopyt va ŭpraŭleńnie Śledčaha kamiteta pa horadu Minsku (vuł.Sapioraŭ, 7). Dopyt doŭžyŭsia kala dźviuch hadzin.
Tam chłopcu paviedamili, što pa hetaj kryminalnaj spravie pierakvalifikavany artykuł. Ciapier Piakarski prachodzić jak abvinavačany pa artykule 341 KK «Apahańvańnie zbudavańniaŭ i psavańnie majomaści». Hety artykuł praduhledžvaje štraf, hramadskija pracy ci aryšt terminam da 3 miesiacaŭ. Raniej Piakarski prachodziŭ jak abvinavačany pa č. 2 art. 339 Kryminalnaha kodeksu – «Chulihanstva, ździejśnienaje hrupaj asobaŭ», jaki praduhledžvaje sankcyi ŭ vyhladzie źniavoleńnia terminam da 6 hadoŭ.
Taksama Maksim Piakarski paviedamiŭ «NN», što jon byŭ aznajomleny z vynikami ekśpiertyz hrafici, ekśpierty nie ŭhladzieli ŭ ich pryznakaŭ ekstremizmu.
«Ja svaju vinu nie pryznaŭ. Nastojvaŭ na tym, što heta maksimum administracyjnaja sprava, ale nijak nie kryminalnaja», — adznačyŭ Piakarski.
Najchutčej, što ŭ bližejšyja dni z pastanovami ab pierakvalifikavańni kryminalnaj spravy buduć aznajomlenyja i inšyja fihuranty – Viačasłaŭ Kasinieraŭ i Vadzim Žaromski.
11 žniŭnia piaciora chłopcaŭ (aryštavanyja byli troje, dvuch adpuścili) byli žorstka zatrymanyja pa padazreńni va ŭdziele pa troch kryminalnych spravach: naniasieńniu biełaruska-moŭnych hrafici «Biełaruś maje być biełaruskaj» i «Revalucyja śviadomaści, jana ŭžo idzie…», a taksama zapeckvańniu farbaj sacyjalnaha bihborda z vyjavami supracoŭnikaŭ milicyi. Pravaabaroncy pryznali ich palitviaźniami. Napiaredadni vybary Piakarski i Žaromski byli vyzvalenyja z turmy, ale kryminalnuju spravu suprać ich nie zakryli.