Biełaruski PEN-centr zasnavaŭ premiju imia Ciotki dla dziciačych piśmieńnikaŭ i ilustrataraŭ
Biełaruski PEN-centr i dabračynny fond «Viartańnie» zasnavali novuju litaraturnuju premiju — imia Ciotki za najlepšuju knihu dla dziaciej i padletkaŭ, paviedamili ŭ piśmieńnickaj arhanizacyi.
Da ŭdziełu ŭ konkursie dapuskajucca knihi, jakija vyjšli ŭ biahučym hodzie na biełaruskaj movie. Žury premii nazavie imiony łaŭreataŭ u dźviuch naminacyjach — «Najlepšy tvor dla dziaciej i padletkaŭ» u prozie, paezii abo dramaturhii, a taksama «Najlepšaje mastackaje afarmleńnie knihi» za ilustracyi.
U kožnaj naminacyi budzie tolki adzin pieramožca, zaachvočvalnych pryzoŭ nie praduhledžana. Łaŭreaty premii atrymajuć hrašovy pryz u biełaruskich rublach, ekvivalentny 2 tysiačam dalaraŭ.
Padrabiaznaja infarmacyja pra padaču zajavak na ŭdzieł u konkursie i premiju ŭ cełym apublikavanaja na aficyjnym sajcie ciotka.by.
Imiony łaŭreataŭ pieršaj premii imia Ciotki buduć nazvanyja viasnoj 2016 hoda.
Jak adznačyli ŭ PEN-centry, «apiekunom» premii za najlepšuju knihu dla dziaciej i padletkaŭ była abranaja biełaruskaja paetka, publicystka i hramadskaja dziajačka kanca XIX — pačatku XX stahodździa Ałaiza Paškievič, najbolš viadomaja pad psieŭdanimam Ciotka.
U svoj čas Paškievič stvaryła pieršuju biełaruskuju škołu ŭ Vilni, zapuściŭšy tym samym masavuju biełaruskamoŭnuju adukacyju. Vystupała redaktarkaj časopisa dla dziaciej i moładzi «Łučynka». Jaje aŭtarstvu naležyć kniha «Pieršaje čytańnie dla dzietak biełarusaŭ».
Pieršaja premija imia Ciotki budzie ŭručanaja ŭ hod, kali spoŭnicca 140 hadoŭ z dnia naradžeńnia Ałaizy Paškievič i 110 hadoŭ z vychadu «Pieršaha čytańnia dla dzietak biełarusaŭ».