Pažyłaja minčanka napała na paštarku z pałkaj
Supracoŭniki adździeła kryminalnaha vyšuku Savieckaha RAUS horada Minska zatrymali 77-hadovuju žycharku stalicy za napad na paštarku, paviedamiła pres-aficer Savieckaha RUUS Alaksandra Papova.
Nadzieŭšy paryk i ŭzbroiŭšysia draŭlanaj pałkaj, piensijanierka staiłasia ŭ kucie leśvičnaj placoŭki na pieršym paviersie svajho padjezda. Zatym jana napała na paštarku, jakaja źbirałasia sychodzić paśla taho, jak raźniesła piensiju. Pažyłaja minčanka chaatyčna nanosiła ŭdary pałkaj, pavaliła supracoŭnicu pošty na ziamlu, adnak žančyna zmahła vybiehčy na vulicu. Jana sprabavała začynić za saboj dźviery, ale napadnica paśpieła vystavić nahu. Kali piensijanierka pačuła, što paštarka telefanuje pa mabilnym telefonie ŭ milicyju, pabiehła ŭ kvateru, u dźviarach zastaŭsia zacisnuty jaje krasovak. Prybiehšy dadomu, žančyna vykinuła ŭ akno paryk, pałku i druhi krasovak.
U RUUS rastłumačyli, što napadnica pryznałasia ŭ svajoj lubovi da kryminalnych sieryjałaŭ. Napiaredadni ŭ adnym ź ich babula ŭbačyła, jak hieroj pry dapamozie pałki adnym udaram pa hałavie pazbaŭlaje prytomnaści čałavieka. Paśla hetaha jana vyrašyła pravieryć, ci zmoža zvalić z noh čałavieka adnym udaram.
U dačynieńni da piensijanierki raspačataja kryminalnaja sprava pa č.3 art.339 (chulihanstva) Kryminalnaha kodeksa Biełarusi. U paštarki — niaciažkija ŭdary i ranki.