ES padvoić abjom finansavaj dapamohi Biełarusi na nastupny hod
Na pieramovach delehacyi Jeŭrasajuza z namieśnikam ministra zamiežnych spraŭ Biełarusi Alenaj Kupčynoj 9 śniežnia ŭ Minsku baki zaćvierdzili paradak dnia dalejšaj realizacyi prahramy «Jeŭrapiejski dyjałoh dla madernizacyi Biełarusi».
Pra heta paviedamiŭ žurnalistam na bryfinhu kiraŭnik delehacyi ES Hunar Vihand, dyrektar departamienta Rasii, Uschodniaha partniorstva, Centralnaj Azii, rehijanalnaha supracoŭnictva i ABSIE Jeŭrapiejskaj słužby źniešnich dziejańniaŭ.Pavodle jaho słoŭ, u paradku dnia abaznačany siem tematyčnych kirunkaŭ, pa jakich budzie vieścisia praca: pryvatyzacyja, handal i inviestycyi, navakolnaje asiarodździe, enierhietyka, transpart, sacyjalnaje raźvićcio, pravy čałavieka. Pa hetych kirunkach, skazaŭ Vihand, vyznačany adzinaccać pryjarytetnych dziejańniaŭ, jakija buduć ažyćciaŭlacca ŭ pieršuju čarhu. Jakija kankretna buduć dziejańni, jeŭračynoŭnik nie ŭdakładniŭ.
Vihand taksama nahadaŭ, što 7—9 śniežnia ŭ Minsku pracavała misija ekśpiertaŭ na čale z načalnikam adździeła Uschodniaha susiedstva hienieralnaha dyrektarata Jeŭrapiejskaj kamisii pa palitycy susiedstva i pieramovach ab pašyreńni Maćje Buskie, jakija byli zaniaty «vyznačeńniem pryjarytetnych kirunkaŭ supracoŭnictva na 2016 hod». Udzielniki hetaj misii, skazaŭ jon, vyznačyli nastupnyja pryjarytetnyja kirunki: «rehijanalnaje raźvićcio, mały i siaredni biźnies, mabilnaść i mihracyja, techničnaja dapamoha ŭ vyrašeńni ekanamičnych pytańniaŭ i zadač».
«My padvoim abjom finansavaj dapamohi na nastupny hod, jaki budzie nakiravany na šerah prahram, meta jakich dapamahčy Biełarusi atrymać dadatkovuju kankurentazdolnaść i novyja mahčymaści ŭ raźvićci ekanomiki i ŭ rehijanalnym raźvićci», — skazaŭ Vihand.
Pavodle jaho słoŭ, na sustrečy ŭ MZS baki taksama abmierkavali mahčymaść «sadziejańnia pa ŭvachodžańni Biełarusi ŭ SHA i dadatkovym kredytavańni Biełarusi z boku mižnarodnych instytutaŭ, u tym liku Jeŭrapiejskaha inviestycyjnaha banka». Hetyja ž pytańni buduć razhledžany 10 śniežnia na sustrečy delehacyi z pradstaŭnikami Ministerstva ekanomiki i Administracyi prezidenta.
«Hetyja kroki nakiravanyja na toje, kab našy adnosiny zrabilisia bolš intensiŭnymi, — padkreśliŭ jeŭračynoŭnik. — Jany źviazany ŭ tym liku z tymi padziejami, jakija adbylisia ŭ Biełarusi sioleta, z tym, što byli vyzvaleny ŭsie palityčnyja źniavolenyja, i z tym, što abmiežavalnyja miery ŭ dačynieńni da Biełarusi byli prypynieny».
Vihand zajaviŭ, što dalejšyja kroki ES u dačynieńni da Biełarusi «buduć źviazany z vynikam pieryjadyčnaha ahladu Savieta pa pravach čałavieka AAN», a taksama z vynikam čakanaj ŭ studzieni nastupnaha hoda «kančatkovaj spravazdačy misii BDIPČ ABSIE, jakaja nazirała za prezidenckimi vybarami ŭ Biełarusi».
Jon padkreśliŭ, što Jeŭrasajuz u svaju čarhu čakaje «dalejšych kankretnych krokaŭ z boku Biełarusi», u pryvatnaści «praduhledžany šerah krokaŭ u śfiery ekanomiki, sacyjalnaj śfiery». «Vy ich sami ŭbačycie, kali paradak dnia stanie publičnym. Mnohija punkty ŭtrymlivajucca ŭ darožnaj karcie, składzienaj pradstaŭnikami Suśvietnaha banka», — patłumačyŭ čynoŭnik ES.
«My taksama razumiejem, što jość šerah palityčnych krokaŭ, jakija, my spadziajemsia, ułady zrobiać. Da prykładu, jany tyčacca ŭniasieńnia papravak u vybarčaje zakanadaŭstva, spraščeńnia ŭmoŭ dziejnaści palityčnych partyj i niaŭradavych arhanizacyj, uviadzieńnia maratoryja na śmiarotnuju karu», — padsumavaŭ Vihand.