Rułon mietału razdušyŭ maładoha rabočaha na zavodzie «Bresthazaaparat»
Brescki mižrajonny adździeł Śledčaha kamiteta pravodzić pravierku pa fakcie śmierci rabočaha SP AAT «Bresthazaaparat», paviedamiła aficyjny pradstaŭnik USK pa Bresckaj vobłaści Maryna Drańkova.
Nadzvyčajnaje zdareńnie adbyłosia 28 śniežnia ŭ presavym cechu pradpryjemstva. Prykładna ŭ 9.40 małady stropalščyk byŭ prycisnuty buchtaj listavoha mietału vahoj kala 3 t. Pavodle papiaredniaj infarmacyi, paśla pieramiaščeńnia buchty na vytvorčuju liniju i rasčapleńnia krapiežnych elemientaŭ pracoŭny znachodziŭsia zzadu jaje. U hety momant jana pachisnułasia i ŭpała na mužčynu.
Paciarpiełaha dastavili ŭ reanimacyjnaje adździaleńnie balnicy chutkaj miedycynskaj dapamohi. Adnak miedyki byli biaśsilnyja.
U 14.30 stropalščyk pamior ad atrymanych cialesnych paškodžańniaŭ.
Dla ŭstanaŭleńnia ŭsich abstavin zdareńnia śledčyja ahledzieli miesca zdareńnia, apytali kaleh stropalščyka, kanfiskavali adpaviednuju dakumientacyju pa technicy biaśpieki.
«Asablivaja ŭvaha nadajecca vyjaŭleńniu pryčyn i ŭmoŭ, jakija pryviali da vytvorčaj traŭmy, jakaja pryviała da śmierć rabočaha», — adznačyła Maryna Drańkova.