Chirurh z rasijskaha Biełharada, jaki źbiŭ pacyjenta da śmierci, raskajaŭsia
Chirurh z rasijskaha Biełharada Illa Zielandzinaŭ, jaki padazrajecca ŭ pryčynieńni pacyjentu śmierci pa nieaściarožnaści, raskajvajecca ŭ tym, što zdaryłasia i źbirajecca pakryć svajakam zahinułaha vydatki na pachavańnie
Ab raskajańni Zielandzinava paviedamiŭ jaho advakat Siarhiej Kryvaroddźka. «Jon nastolki raskajvajecca, (ščyra vam kažu — nie jak advakat), jon ščyra raskajvajecca, i sam nie moža zrazumieć, jak takoje mahło adbycca», — skazaŭ Kryvarodźka.
Pa słovach advakata, Zielandzinaŭ kampiensavaŭ siamji i blizkim zahinułaha vydatki na pachavańnie i paminki — sumarna bolš za 150 tys. rasijskich (kala 2 tys. dalaraŭ). Kryvarodźka padkreśliŭ, što sužycielka pacyjenta, jaki zahinuŭ u vyniku dziejańniaŭ Zielandzinava, u svajoj zajavie napisała, što «całkam atrymała škodu i pretenzij nie maje». Advakat taksama adznačyŭ, što doktar i abarona chočuć taksama pakryć škodu dačce zahinułaha, jakaja pryjechała z Kijeva, ale «jana nie žadaje kantaktavać».
Incydent sa źbićciom pacyjenta adbyŭsia ŭ biełharodskaj balnicy 29 śniežnia. U toj dzień 57-hadovy pacyjent balnicy Jaŭhien Vachcin padčas adnoj z pracedur udaryŭ nahoj miedsiastru. Jak paźniej raspaviadaŭ vidavočca zdareńnia, Alaksandr Aviłaŭ, pacyjent udaryŭ miedsiastru vypadkova, padčas pramyvańnia straŭnika, paśla čaho paprasiŭ prabačeńnia pierad žančynaj. Svajačka zahinułaha śćviardžaje, što Vachcin nie biŭ miedsiastru, a tolki rezka adchiliŭ jaje rukoj.
Zielandzinaŭ zastupiŭsia za žančynu, udaryŭ mužčynu pa tvary, paśla čaho mužčyna ŭpaŭ. Pa viersii śledstva, Vachcin pamior ad čerapna-mazhavoj traŭmy ad udaru patylicaj pry padzieńni.