U Miunchienie, zdajecca, damovilisia nakont spynieńnia vajny ŭ Siryi
Na pieramovach kantaktnaj hrupy pa Siryi ŭ Miunchienie dasiahnuta pahadnieńnie ab nieadkładnym «značnym skaračeńni hvałtu», jakoje «praz tydzień pavinna pryvieści da kanca bajavych dziejańniaŭ», zajaviŭ u noč na piatnicu, 12 lutaha, ministr zamiežnych spraŭ FRH Frank-Valter Štajnmajer.
Pa słovach Štajnmajera, buduć adnoŭlenyja pastaŭki charčavańnia i miedykamientaŭ u błakavanyja nasielenyja punkty. Bajavyja dziejańni suprać «Isłamskaj dziaržavy» i «Frontu an-Nusra» buduć praciahnutyja, padkreśliŭ kiraŭnik MZS FRH.
Ministr zamiežnych spraŭ RF Siarhiej Łaŭroŭ zajaviŭ ab stvareńni rabočaj hrupy RF—ZŠA pa spynieńni ahniu ŭ Siryi, kudy ŭvojduć dypłamaty i vajskoŭcy. Praca hrupy pačniecca «užo zaŭtra ŭ Ženievie i budzie prachodzić rehularna». Upieršyniu «zamacavana nieabchodnaść supracoŭnictva i kaardynacyi nie tolki pa palityčnych i humanitarnych pytańniach, ale i pa vajennym vymiareńni siryjskaha kanfliktu», udakładniŭ Łaŭroŭ.
Maskva spadziajecca, što ŭdzielniki kantaktnaj hrupy «vykarystoŭvajuć svoj upłyŭ na adpaviednyja apazicyjnyja hrupy, kab jany ŭ poŭnaj miery supracoŭničali z AAN», padkreśliŭ kiraŭnik MZS RF.
Pieramovy ŭ Ženievie
Mirnyja pieramovy pamiž siryjskimi paŭstancami i ŭradam u Ženievie buduć adnoŭlenyja «tak chutka, jak heta mahčyma», zajaviŭ paśla zakančeńnia sustrečy ŭ Miunchienie dziaržsakratar ZŠA Džon Kiery.
«Kali my ŭbačym realizacyju pahadnieńniaŭ na spravie, to nas z vami vielmi chutka čakaje sustreča ŭ Ženievie», - taksama paćvierdziŭ pradstaŭnik Najvyšejšaha kamiteta pa pieramovach (NHC) siryjskaj apazicyi Salem al-Musłat.