Łukašenka čakaje Pucina. Minsk — finansavaj padtrymki Maskvy
25 lutaha ŭ Minsku pad staršynstvam biełaruskaha prezidenta projdzie pasiadžeńnie Vyšejšaha dziaržsavieta Sajuznaj dziaržavy. Alaksandr Łukašenka i Uładzimir Pucin sustrenucca ŭ Pałacy Niezaležnaści.
Reuters.com
Pravieści pasiadžeńnie ŭ Biełarusi prapanavaŭ Alaksandr Łukašenka. Papiaredni dziaržsaviet prachodziŭ u Maskvie amal hod tamu, 3 sakavika 2015 hoda. A apošniaja sustreča Pucina i Łukašenki adbyłasia ŭsiaho try tydni tamu, u Sočy, dzie biełaruski prezident pravodziŭ karotkaterminovy adpačynak.
Jak paviedamlaje pres-słužba Kramla, niepasredna pierad pasiadžeńniem Uładzimir Pucin i Alaksandr Łukašenka praviaduć asobnuju sustreču, padčas jakoj «abmianiajucca dumkami ab dalejšym raźvićci rasijska-biełaruskich adnosin, a taksama pa aktualnych mižnarodnych temach».
Pavodle aficyjnaj infarmacyi, na pasiadžeńni dziaržsavieta prezidenty, premjer-ministry i vyšejšyja čynoŭniki dźviuch krain buduć abmiarkoŭvać biudžet Sajuznaj dziaržavy na 2016 hod i prahramu dziejańniaŭ u halinie źniešniaj palityki na 2016-2017 hady.
U Biełarusi taksama čakajuć rašeńnia ab mahčymaści finansavaj padtrymki, pra jakuju damovilisia Łukašenka i Pucin u Sočy.
«Rasijanie, pry ŭsioj składanaści, vusnami i premjera, i prezidenta Rasii, ź jakimi ja dvojčy sustrakaŭsia za tydzień, prosta skazali: u nas niama inšaha vyjścia, jak padtrymlivać Biełaruś,bo našy tam intaresy, my šmat u čym zaležym ad Biełarusi, — raspavioŭ biełaruski prezident, viarnuŭšysia ŭ Minsk z Sočy. — Situacyja niaprostaja, ale nie śmiarotnaja. I jany (rasijanie) kažuć: tak, nie śmiarotnaja ni ŭ vas, ni ŭ nas. Ale my bačym niejkija paryvy ŭ finansavańni i hetak dalej, my dapamožam, u płanie refinansavańnia i zapazyčańnia praź Jeŭrazijski bank raźvićcia».
Taksama ŭ pasiadžeńni Vyšejšaha dziaržsavieta Sajuznaj dziaržavy prymie ŭdzieł premjer-ministr Rasii Dźmitryj Miadźviedzieŭ.