Fryłansiera-žurnalista Kastusia Žukoŭskaha aštrafavali na 16,8 młn rubloŭ
Sudździa Valancina Saponava ŭ sudzie Žłobinskaha rajona 24 lutaha razhledzieła dva administracyjnyja pratakoły na homielskaha žurnalista-fryłansiera Kanstancina Žukoŭskaha.
Žurnalista vinavacili ŭ niezakonnym vyrabie pradukcyi ŚMI. Žłobinskija milicyjanty adznačyli, što Žukoŭski biez akredytacyi karespandenta zamiežnaha ŚMI zrabiŭ videasiužety, pakazanyja ŭ efiry spadarožnikavaha telekanała «Biełsat».
Sudździa pryznała fryłansiera vinavatym i aštrafavała pa abodvuch pratakołach na 16,8 młn rubloŭ (80 bazavych vieličyniaŭ), pieradaje BiełaPAN.
Fryłansier na sudzie svaju vinu nie pryznaŭ i zajaviŭ, što nie znachodzicca ŭ pracoŭnych adnosinach z telekanałam «Biełsat».
Darečy, Žukoŭskaha ŭžo nieadnojčy sudzili pa abvinavačańni ŭ niezakonnym vyrabie pradukcyi ŚMI. Ahulnaja suma jaho štrafaŭ skłała ŭžo kala 70 młn rubloŭ.