U Pałac Niezaležnaści pryjechali členy biełaruskaha ŭrada i Miadźviedzieŭ, čakajuć Łukašenku i Pucina
U Pałacy Niezaležnaści siońnia projdzie pasiadžeńnie Vyšejšaha dziaržsavieta Sajuznaj dziaržavy. Pierad samim pasiadžeńniem pavinna adbycca sustreča prezidentaŭ Biełarusi i Rasii.
U Pałacy Niezaležnaści z 12.00 znachodziacca biełaruskija i rasijskija žurnalisty — usiaho kala 160 čałaviek. Prybyli členy biełaruskaha ŭrada: jany razmaŭlajuć pamiž saboj u asnoŭnym chole. Siarod prysutnych pieršy vice-premjer Vasil Maciušeŭski, vice-premjer Uładzimir Siamaška, ministr zamiežnych spraŭ Uładzimir Makiej, enierhietyki Uładzimir Patupčyk, abarony Andrej Raŭkoŭ, kultury Barys Śviatłoŭ, ministr sielskaj haspadarki Leanid Zajac i ministr finansaŭ Uładzimir Amaryn.
Kala 14.20 pryjechaŭ kiraŭnik urada RF Dźmitryj Miadźviedzieŭ: zajšoŭ u pałac, vielmi chutka, nie spyniajučysia, prajšoŭ pa chole i padniaŭsia navierch, u zału pasiadžeńniaŭ. Pa dadzienych rasijskich žurnalistaŭ, uradavaja delehacyja RF užo znachodzicca ŭ Minsku.
Michaił Miaśnikovič chadziŭ pa chole ŭ dobrym nastroi: «Nu čamu vy adrazu kažacie pra doŭh? Žyć treba na svaje, hrošy ŭ nas jość, — razvažaje jon. — Viadoma, kredyt nam patrebien, ale nie dla prajadańnia, a pad dobryja prajekty ».
Kala 14.30 Siarhiej Łaŭroŭ, Uładzimir Makiej i Vasil Maciušeŭski zajšli ŭ čajny pakoj i začynili za saboj dźviery. Krychu paźniej da ich dałučyŭsia dziaržsakratar Sajuznaj dziaržavy Ryhor Rapota.
Bližej da 15.00 u Pałac Niezaležnaści uvajšoŭ premjer-ministr Biełarusi Andrej Kabiakoŭ.
Alaksandra Łukašenki i Uładzimira Pucina pakul niama. Płanavałasia, što sustreča dvuch prezidentaŭ pačniecca ŭ 14.00.
U suviazi ź vizitam rasijskaj delehacyi na niekatorych darohach Minska i Minskaj vobłaści ŭvodziacca abmiežavańni ruchu ŭsich vidaŭ transpartu. Havorka idei ab M2 i R80 Słabada — Papiernia, akramia taho zatoravyja situacyi mahčymyja i ŭ Minsku: dla prajezdu karteža buduć paetapna pierakryvacca centralnyja vulicy horada, asabliva składanaja situacyja prahnazujecca na prylehłych da praśpiektach Niezaležnaści, Pieramožcaŭ i Arłoŭskaj vulicach, a taksama MKAD.