Dziaržpahrankamitet prakamientavaŭ infarmacyju ab mahčymym zakryćci Litvoj miažy
Pres-sakratar Dziaržaŭnaha pahraničnaha kamiteta Biełarusi Alaksandr Ciščanka prakamientavaŭ infarmacyju, što źjaviłasia ŭ internecie, ab mahčymym zakryćci Litvoj miažy.
Učora ŭ ŚMI sa spasyłkaj na vice-ministra ŭnutranych spraŭ Litvy Elvinasa Jankiavičusa paviedamili, što Litva hatova pry nieabchodnaści zakryć miažu ź Biełaruśsiu, kali da jaje nabliziacca niekantralavanyja patoki biežancaŭ.
«Chutčej za ŭsio, heta fraza była vyrvana z kantekstu. Patokaŭ biežancaŭ na biełaruska-litoŭskaj miažy apryjory nie moža być. Kab prahnazavać takija rečy, nam spačatku treba atrymać vychad da Ehiejskaha mora. My ž nie Hrecyja», — skazaŭ Alaksandr Ciščanka.
Pry hetym jon adznačyŭ, što ź Biełaruśsiu ŭ Litvy niama nijakich prablem pa linii hranicy. «Vysoki ŭzrovień supracoŭnictva i vyrašeńnia prablem ź Litvoj daje mahčymaść kantralavać situacyju. My na rańniaj stadyi vyjaŭlajem mahčymyja patoki i tendencyi. Spyniajem nie tolki kanały mihracyi, a navat ich arhanizacyju», — adznačyŭ pres-sakratar.