Zavieršana śledstva pa spravie hałoŭnaha budaŭničaha inśpiektara pa Minsku
Va ŭpraŭleńni Śledčaha kamiteta pa Minsku zavieršana rasśledavańnie kryminalnaj spravy ŭ dačynieńni da byłoha načalnika inśpiekcyi departamienta kantrolu i nahladu za budaŭnictvam pa Minsku.
Jak paviedamiŭ BiełaPAN aficyjny pradstaŭnik USK pa Minsku Alaksandr Hierasimaŭ, čynoŭnik byŭ zatrymany ŭ śniežni 2015 hoda na pracoŭnym miescy z dokazami złačynstva, pry atrymańni chabaru.
Ustanoŭlena, što načalnik inśpiekcyi, abaviazany ažyćciaŭlać kantrol za chodam budaŭniča-mantažnych rabot, jakija pravodziacca na terytoryi horada, vykarystoŭvaŭ słužbovyja paŭnamoctvy ŭ karyślivych metach. Čynoŭnik takim čynam pabudavaŭ ŭzajemaadnosiny z zasnavalnikam pryvatnaha pradpryjemstva, jaki źjaŭlajecca hienieralnym padradčykam na budaŭnictvie handlova-administracyjnaha kompleksu, što apošni byŭ vymušany dać chabar za atrymańnie zaklučeńnia inśpiekcyi ab hatoŭnaści abjekta da pryjomki ŭ ekspłuatacyju. Pry hetym padstaŭ, jakija pieraškadžajuć vydačy dakumienta va ŭstanoŭlenym zakonam paradku, nie miełasia.
Niezakonnaje ŭznaharodžańnie ŭ sumie 5 tys. dołaraŭ ZŠA pieradavałasia načalniku inśpiekcyi častkami, u niekalki etapaŭ. Akramia taho, zasnavalnik budaŭničaha pradpryjemstva zapłaciŭ kala 20 młn. rubloŭ za vyrab mebli ŭ kvatery žonki atrymalnika chabaru.
Dziejańni słužbovaj asoby kvalifikavanyja pa č. 2 art. 430 KK (atrymańnie chabaru ŭ bujnym pamiery). U chodzie rasśledavańnia da abvinavačanaha była prymieniena miera strymańnia ŭ vyhladzie zaklučeńnia pad vartu.
Nakładzieny aryšt na jaho majomaść u sumie bolš za 1,8 młrd. rubloŭ, u tym liku kvateru, ziamielny ŭčastak z pabudovami, aŭtamabil i hrašovyja srodki na rachunkach u bankaŭskich ustanovach.
Kryminalnaja sprava pieradadziena prakuroru dla nakiravańnia ŭ sud.