List čytača: Alaksandr Łukašenka, zrabicie padarunak biełaruskim žančynam — uviadzicie narkakantrol na miažy z Rasijaj!
6 sakavika hladzieŭ štotydniovuju analityčnuju pieradaču «Kontury» na telekanale ANT. Na samym pačatku byŭ vialiki siužet pra milicyju i intervju ź ministram MUS Šunievičam, jaki zaznačyŭ: «Tradycyjna Biełaruś ličyłasia tranzitnaj krainaj dla narkotykaŭ. Siońnia, na žal, my razhladajemsia narkadziałkami jak kraina-spažyviec».
Dalej byŭ vialiki repartaž pra baraćbu z narkotykami, pra sudovy praces nad siamnaccaćciu narkadziałkami i prahučali takija słovy: «Amal usie narkotyki prychodziać z uschodu. Nadhladu na miažy niama. Tamu hałoŭny kozyr apieratyŭnikaŭ — šyrokija ahienturnyja sietki ŭnutry krainy». I — nivodnaha słova pra namiery ci nieabchodnaść abaranić Biełaruś ad rasijskaha narkatrafiku. Nahadaju, što pieradača idzie na prezidenckim telekanale, jana analityčnaja, u studyi siadzić i razvažaje ministr.
Što ž adbyvajecca? Jakija vysnovy možna zrabić?
Z zachodniaj miažy štotydzień prychodziać paviedamleńni pra zatrymańni hramadzianaŭ Rasii za narkotyki. Naprykład, «bresckija mytniki zatrymali rasijan z zabaronienymi kurylnymi sumiesiami i tabletkami, jakija źmiaščajuć psichatropy. (…) Kiroŭca i jaho pasažyrka z Rasii vieźli praz punkt mytnaha afarmleńnia «Damačava» u Jeŭropu 225 tabletak «Tramadol» na mikraaŭtobusie «Mercedes Sprinter». Jašče 150 takich samych preparataŭ kanfiskavali ŭžo ŭ rejsavym aŭtobusie Varšava-Minsk u adnoj z pasažyrak u respublikanskim punkcie mytnaha afarmleńnia «Varšaŭski most». (…) A ŭ RPMA «Brest-Centralny» raspačaty dva administracyjnyja pracesy ŭ dačynieńni da dvuch hramadzian Rasii i tadžyka. Jany vieźli bolš za 900 hram nasvaju, zabaronienaha ŭ Biełarusi».
Krychu raniej, 11 studzienia, bresckija mytniki raspačali try kryminalnyja spravy ŭ dačynieńni da hramadzian, jakija sprabavali pravieźci praź miažu tabletki, jakija źmiaščajuć narkatyčnyja rečyvy. Fihurantami stali žychary Biełarusi i Rasii: «Hramadzianka Biełarusi, jakaja nakiroŭvałasia z Polščy na turystyčnym aŭtobusie praz PTA «Varšaŭski most», sprabavała pieravieźci praź miažu 100 tabletak tramadołu». U tym ža punkcie afarmleńnia ŭ 40-hadovaha hramadzianina Rasii «mytniki znajšli bolš za 100 takich samych tabletak. A pasažyr ciahnika «Ciarespal-Brest» schavaŭ ad kantrolu 27 tabletak Cirrus».
Na ŭschodniaj miažy — ciša. Narkotyki płyvuć bieśpieraškodna. Tolki čutna, što atrady mytnikaŭ łoviać na nieisnujučaj miažy z Rasijaj rybu za toje, što pierasolena ci niedasolena, frukty, harodninu… A narkotyki jeduć.
Padčas sudovaha pracesu nad narkadziałkami prahučała pryznańnie adnaho sa złačyncaŭ: «Skrynki z narkotykami pieravoziŭ u Biełaruś z Maskvy». Heta ž paŭtaryŭ aŭtar repartažu na ANT.
Dyk cikava, čamu nie ŭvodziać narkakantrol na miažy z Rasijaj? Jak sam ministr zaznačyŭ, my ŭžo pieratvarylisia z tranzitnaj dla narkaty krainy ŭ spažyŭcoŭ.
Alaksandr Łukašenka aficyjna pavinšavaŭ biełaruskich žančyn ź Mižnarodnym žanočym dniom. Ujavicie, jaki šykoŭny padarunak jon moh by zrabić usim žančynam našaj krainy — uvieści narkakantrol na miažy z Rasijaj. Tady dzieci byli b značna bolš abaronieny ad narkapahrozy. Niaviesty nie nasili b pieradačy ŭ turmy i reanimacyi dla svaich žanichoŭ…