Dziaržstandart zabaraniŭ realizacyju niekatorych marak rasijskich i kitajskich śviacileń
U Dziaržstandarcie adznačajuć, što pačaścilisia fakty nieadpaviednaści impartnych śviacileń patrabavańniam elektramahnitnaj sumiaščalnaści. Dziejańnie siertyfikataŭ adpaviednaści, vydadzienych na śviacilni handlovych marak «Nordklif», EKF, «Ksienon», na terytoryi Biełarusi spyniena, paviedamiła pres-słužba kamiteta.
Tak, z pačatku 2016 hoda ŭžo vydadziena čatyry pradpisańni ab zabaronie ŭvozu i abaračeńnia na rynku krainy luminiescentnych i śviatłodyjodnych śviacileń kitajskaj i rasijskaj vytvorčaści pa pryčynie ich nieadpaviednaści patrabavańniam elektramahnitnaj sumiaščalnaści, ustanoŭlenym u techničnym rehłamiencie Mytnaha sajuza «Elektramahnitnaja sumiaščalnaść techničnych srodkaŭ» (TR MS 020/2011).
Pravierki byli praviedzieny inśpiekcyjaj Dziaržstandartu pa Minskaj vobłaści i Minsku ŭ aptovych pastaŭščykoŭ: TAA «Miehatron M», zamiežnaha UP «Ełśvi», PHUP «Łaśbiełsnab».
Pa vynikach vyprabavańniaŭ asobnych madelaŭ śviacileń handlovych marak «Nordklif», EKF, «Ksienon» ustanoŭlena, što elektramahnitnyja pieraškody ad ich pieravyšali dapuščalnuju normu bolš čym na 20%. Vykarystańnie takich śviacileń moža admoŭna adbicca na funkcyjanavańni inšaha abstalavańnia, padłučanaha da sietki, pahoršyć jakaść pracy pryjomnych i pieradajučych pryładaŭ, kantrolna-vymiaralnaj aparatury, pryvieści da zboju ich pakazańniaŭ, što, u svaju čarhu, stvaraje ryzyki dla žyćcia i zdaroŭja spažyŭcoŭ.
Najbolš raspaŭsiudžanaj pryčynaj hetaj nieadpaviednaści patrabavańniam techničnaha rehłamientu inśpiektary nazyvajuć toje, što vytvorcy nie praduhledžvajuć u kanstrukcyi albo nie zabiaśpiečvajuć u pracesie vytvorčaści najaŭnaść u vyrabach filtraŭ, jakija padaŭlajuć pieraškody. Heta, z adnaho boku, źnižaje kančatkovuju canu na śviacilni, ale ź inšaha — robić ich niebiaśpiečnymi dla spažyŭcoŭ, adznačyła pres-słužba.
Adnačasova ŭ chodzie pravierak inśpiekcyjaj Dziaržstandartu pa Minskaj vobłaści i Minsku byli ŭstanoŭleny fakty nieadpaviednaści nazvanych madelaŭ śviacileń i patrabavańniam techničnaha rehłamientu Mytnaha sajuza «Ab biaśpiecy nizkavoltnaha abstalavańnia» (TR MS 004/2011).
U śviacilniach handlovych marak EKF, «Ksienon» nie zabiaśpiečvaŭsia nieabchodny ŭzrovień abarony ad uździejańnia elektryčnaha toku. Dla ŭnutranaha mantažu hetych madelaŭ śviacileń vykarystoŭvalisia zanadta tonkija pravady. Materyjał korpusa (patrona) byŭ u 2,5 razu mieniej ustojlivy da nahrevu, čym heta dapuskajecca patrabavańniami. Prymianieńnie takich kamplektujučych vyrabaŭ i materyjałaŭ viadzie da ŭźniknieńnia pažaraniebiaśpiečnych situacyj pry pierahruzkach u sietcy, avaryjnych režymach i admovach.
Było taksama ŭstanoŭlena, što śviacilni «Ksienon» nie adpaviadajuć patrabavańniam biaśpieki pa stojkaści da ŭzharańnia i pa abaronie ad paražeńnia elektryčnym tokam.