100 hadoŭ pryhažości za adnu chvilinu VIDEA
20 listapada 2014 hoda kamanda daśledčykaŭ i stylistaŭ partała cut.com apublikavała pieršy rolik prajekta «100 Years of Beauty». Jon staŭ sapraŭdnym chitom; na prajekt źviarnuli ŭvahu suśvietnyja ŚMI, što značna paspryjała jaho raspaŭsiudžanaści. Na siońniašni dzień na YouTube pieršy epizod prajekta «100 Years of Beauty» pahladzieli bolš jak 28 młn razoŭ, rolik sabraŭ amal 150 000 łajkaŭ.
Ciapier «100 hadoŭ pryhažości» ŭklučaje 18 videa, što pakazvajuć, jak palityčnyja, kulturnyja dy inšyja značnyja padziei ŭpłyvali dy adlustroŭvalisia na modzie i vyhladzie ludziej. Stvaralniki vyłučajuć krainu, zaprašajuć madel i ź jaje dapamohaj robiać rekanstrukcyju modnych vobrazaŭ (pryčoska + makijaž) z roznych dziesiacihodździaŭ. Apošni epizod pryśviečany čarnaskurym mužčynam ZŠA, jon vyjšaŭ 24 lutaha 2016 hoda; prajekt nie skončany.
Pieršy, a tady i druhi rolik adlustroŭvaje evalucyju pryhažości ŭ ZŠA. Madelami stali adpaviedna biełaja i čarnaskuraja žančyny.
Treciaje videa pryśviečana Iranu. Aproč inšaha, adlustravana zabarona na chidžab bolš jak na 40 hod.
Čaćviortaj stała Kareja. Pačynajučy ź pieryjadu 60-ch hadoŭ pakazvajucca dva vobrazy, što źviazana z padzialeńniem krainy na Paŭnočnuju i Paŭdniovuju.
U piatym roliku nas znajomiać ź Mieksikaj. Na žanočuju modu hetaj krainy paŭpłyvała hramadzianskaja vajna, taksama dobra čytajecca vobraz Frydy Kało.
Šostyja Filipiny: adčuvajecca značny ŭpłyŭ ZŠA.
Siomy rolik prezientuje Indyju. U adroźnieńnie ad papiaredniaha, jon vielmi aŭtentyčny. Bačna, što pieradusim zaŭsiody byli mocnyja ŭłasnyja tradycyi.
Vośmaj stała Rasija. U minułym stahodździ hetuju krainu šturchała z adnaho boku ŭ procilehły, heta bačna i pa modnych vobrazach. Zaviaršaje rolik skandalny vobraz Pussy Riot.
Dziaviataja — Italija. Dla mody hetaj krainy zaŭsiody byli charakternyja admietnaść i kreatyŭ. Heta zaŭvažna adroźnivała italjanskich modnic ad astatniaj Jeŭropy.
Dziasiataje videa raspaviadaje pra Hiermaniju. Tut taksama isnujuć dva paralelnyja vobrazy, jakija adlustroŭvajuć padzieł krainy Bierlinskaj ścianoj u 1961 hodzie.
Jaskravaja Brazilija stała adzinaccataj krainaj, što zacikaviła kamandu Cut Video.
Dvanaccataje videa pradstaŭlaje amierykanskaha mužčynu. Hetak jak i pra amierykanskich žančyn, pra mužčyn ZŠA było źniata dva roliki. U pieršym pradstaŭleny mužčyna bieły.
Trynaccataj stała afrykanskaja Efiopija. Apošniaje stahodździe pryniesła značnyja źmieny hetaj krainie, što bačna pa vobrazach jaje žančyn.
Čatyrnaccaty rolik viartaje nas u ZŠA. Hetym razam nam pakazvajuć amierykanskija tatu. Madel pahadziłasia na varjacki ekśpierymient — joj nabili 11 tatuirovak za tydzień.
Piatnaccaty — Kitaj. Kitaj — adna z krain, što źviedała značnyja źmieny za minułaje stahodździe. Heta adlustravana ŭ nastupnym videaroliku.
U šasnaccatym roliku daśledčyki źviartajucca da Japonii. Upłyŭ Zachadu adčuvajecca, ale japonki zaŭsiody dadajuć ŭ vobrazy niešta svajo. Heta robić ich unikalnymi. Pačynajučy z 90-ch hadoŭ, moda stvaraje dva supraćlehłyja styli: spakojny i jarki, hučny. Heta pakazana ŭ videa.
Siamnaccaty rolik pry Jehipiet. Padajecca, što jon nie zusim pra pryhažość, a pra svabodu, roŭnaść i braterstva. Dobra prasočvajucca źmieny palityčnych i sacyjalnych pohladaŭ jehipcianak.
Apošni, vasiamnaccaty, apublikavany rolik pakazvaje, jak mianialisia čarnaskuryja amierykanskija mužčyny.
Prajekt «100 Years of Beauty» stvaryŭ natoŭp pierajmalnikaŭ. U šmat jakich krainach, što nie trapili da ŭvahi kamandy Cut Video, byli źniatyja anałahičnyja videaroliki pra evalucyju pryhažości miascovych dziaŭčat. Takija videa jość, naprykład, u Litvy, Manholii, Kirhizii dy inšych.