Supracoŭnikaŭ milicyi na pracesie pa «spravie 17-ci» dapytajuć u zakrytym režymie
Supracoŭnikaŭ hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS Biełarusi na pracesie pa «spravie siamnaccaci» dapytajuć u zakrytym režymie.
Praces pa spravie samaj bujnoj u historyi Biełarusi hrupy pa raspaŭsiudžvańni narkotykaŭ praciahvajecca 5 krasavika ŭ Minharsudzie. Na łavie padsudnych 17 čałaviek.
Načalnik HUBAZiK pałkoŭnik milicyi Mikałaj Karpiankoŭ nakiravaŭ u sud list z prośbaj dopyt śviedak z šerahu jaho supracoŭnikaŭ pravieści ŭ zakrytym režymie. Svaju prośbu Karpiankoŭ arhumientavaŭ tym, što ŭ zale suda znachodziacca žurnalisty, jakija mohuć paviedamić u ŚMI źviestki pra apieratyŭnikaŭ i ich pracu.
Advakaty vystupili suprać hetaj prośby. «Litaralna na dniach ja hladzieŭ pa televizary pieradaču, pryśviečanuju jubileju HUBAZ. Jany davali intervju, nie chavali svaje proźviščy i asoby, tamu nie baču pieraškodaŭ dapytać ich u adkrytym sudovym pasiadžeńni. Prośba Karpiankova vyhladaje jak žadańnie schavać realnyja akaličnaści spravy», — zajaviŭ advakat Siarhiej Cielaževič, jaki abaraniaje intaresy byłoha supracoŭnika HUBAZiK Kanstancina Dzienisieviča.
«ŚMI ŭžo daŭno paviedamili ŭsie proźviščy, — adznačyła advakat Ihara Karyckaha, byłoha supracoŭnika KDB. — Kali śviedki čahości aścierahajucca, jany mohuć schavać svaje asabistyja źviestki. Źviartaju ŭvahu, što ni adzin z dopytaŭ supracoŭnikaŭ HUBAZ na papiarednim śledstvie zasakrečany nie byŭ».
«Karpiankoŭ sam nieadnarazova davaŭ intervju žurnalistam ab akaličnaściach spravy, — zajaviła advakat abvinavačanaha Kanstancina Viluhi Halina Raždziestvienskaja. — Tamu nie baču pryčyn dla zadavalnieńnia prośby, zajaŭlenaj u liście z HUBAZ».
Abvinavačanyja adnadušna padtrymali svaich abaroncaŭ. «Svabodu słova!» — kryčali jany z kletak.
Adnak sud, spasyłajučysia na zakon «Ab dziaržaŭnych sakretach», usio ž taki pryniaŭ rašeńnie dapytać supracoŭnikaŭ HUBAZiK ŭ zakrytym režymie. Razam z žurnalistami zału suda pakinuli svajaki abvinavačanych. Šeść čałaviek mierkavana ź liku rabotnikaŭ MUS čakajuć vykliku na dopyt kala zały sudovaha pasiadžeńnia