U Biełarusi zrabili bolš žorstkim pakarańnie za pravoz praź miažu niezadekłaravanych najaŭnych hrošaj
U Biełarusi zrabili bolš žorstkim pakarańnie za pravoz niezadekłaravanych najaŭnych hrošaj praź biełaruski ŭčastak hranicy Jeŭrazijskaha ekanamičnaha sajuza. Ciapier kali ŭ padarožnika znojduć niaŭličanuju «hatoŭku» na sumu bolš za 30 tysiač dalaraŭ, to jamu pahražaje nie tolki štraf, jak było raniej, ale i pazbaŭleńnie voli na termin da 5 hadoŭ.
«4 krasavika 2016 hoda ŭstupiŭ u siłu Zakon Respubliki Biełaruś ad 5 studzienia 2016 hoda № 356-Z «Ab uniasieńni źmianieńniaŭ i dapaŭnieńniaŭ u niekatoryja kodeksy Respubliki Biełaruś», normy jakoha praduhledžvajuć ŭniasieńnie źmianieńniaŭ i dapaŭnieńniaŭ u Kryminalny i Kryminalna-pracesualny kodeksy Respubliki Biełaruś», — havorycca na sajcie DMK.
Ciapier za niezakonnaje pieramiaščeńnie praź biełaruski ŭčastak hranicy JEAES najaŭnych hrošaj i hrašovych instrumientaŭ praduhledžana nie tolki administracyjnaja, ale i kryminalnaja adkaznaść.
Pry pieramiaščeńni praź biełaruski ŭčastak mytnaj miažy JEAES najaŭnych abo hrašovych instrumientaŭ na sumu zvyš 10 000 dalaraŭ ich treba abaviazkova zadekłaravać. Kali padarožnik nie zrobić hetaha, pry hetym niezadekłaravanych suma nie pieravysić 30 tysiač dalaraŭ, to ŭ takim vypadku praduhledžana administracyjnaja adkaznaść — štraf ad piaci da tryccaci bazavych vieličyń (ad 10 miljonaŭ 50 tysiač rubloŭ da 6,3 miljona). Da taho ž u parušalnika kanfiskujuć sumu, jakaja pieravyšaje 10 tysiač dalaraŭ.
Za sprobu pravieźci praź miežy JEAES najaŭnyja hrošy abo hrašovych instrumientaŭ na sumu bolš za 30 tysiač dalaraŭ z 4 krasavika ŭvodzicca kryminalnaja adkaznaść u vyhladzie štrafu, abo abmiežavańnia voli na termin ad dvuch da piaci hadoŭ, abo pazbaŭleńnia voli na toj ža termin.
***
Nahadajem, z 23 lipienia minułaha hoda mytniki mohuć składać administracyjnyja pratakoły na hramadzian, jakija pierasiakajuć miažu ŭ punktach propusku, kali ŭ ich dakumientach, pradjaŭlenych dla pravierki, znachodziacca hrošy. Za hetaje parušeńnie možna atrymać štraf da 50 bazavych vieličyń (10,5 miljonaŭ rubloŭ). Kali ž mytniki paŭtorna znojduć u pašparcie vandroŭcy hrošy, to štraf vyraście da 21 miljona rubloŭ.